ލަންކާއަށް އެހީވުމަށް މާދަމާ ރާއްޖޭގައި ޓެލެތޯންއެއް ބާއްވަނީ

ލަންކާއަށް އެރި ބާރުގަދަ ތޫފާނާއިއެކު އެގައުމަށް ބޮޑެތި ގެއްލުންތަކެއްވެ ބައިނަލަގްވާމީ އެހީއަށް އެދިފައިވާ ދަނޑިވަޅެއްގައި ރާއްޖެއިންވެސް ލަންކާއަށް އެހީވުމަށް ޚާއްސަ ޓެލެތޯންއެއް ކުރިޔަށް ގެންދަން ތައްޔާރުވެއްޖެ އެވެ.

މި ޓެލެތޯން ކުރިޔަށްގެންދިޔުމަށް ނިންމައި އެކަން ރަސްމީކޮށް އިއުލާނުކުރީ ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް)އިންނެވެ.

އެގޮތުން ޕީއެސްއެމުން މިއަދު ނެރުނު ބަޔާނެއްގައި ބުނީ މި ޓެލެތޯން ކުރިއަށް ގެންދަން ނިންމާފައިވަނީ މާދަމާ 30 ނޮވެންބަރު 2025ވާ އާދީއްތަ ދުވަހު ހެނދުނު 9:00އިން މެންދަމު 1:00އަށް ކަމަށެވެ.

އަދި މި ހަރަކާތަކީ ލަންކާއަށް ކުރިމަތިވެފައިވާ ހިތާމަވެރި ޙާލަތުގައި ދިވެހިންނަށް ދެވެން އޮތް ކޮންމެ އެހީތެރިކަމެއް ދިނުން މުހިއްމުކަމަށް ދެކޭތީ ކުރިޔަށްގެންދާ ޓެލެތޯންއެއް ކަމަށް ޕީއެސްއެމުން ވަނީ ބުނެފައި އެވެ.

ޕީއެސްއެމުން ވަނީ މި ޓެލެތޯނުގައި ޕީއެސްއެމްއާއި ބައިވެރިވުމަށް ރާއްޖޭގެ ހުރިހާ ނޫސް މީޑިއާތަކަށް ދަޢުވަތުދީފައެވެ. އަދި މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށް، ޖަމްޢިއްޔާ، ޖަމާޢަތް، ކްލަބްތަކާއި އޮފީސްތައް ފަދަ ހުރިހާ ތަންތަނަށްވެސް އޮތް ކަމަށް ޕީއެސްއެމުން ނެރުނު ބަޔާނުގައި ވަނީ ހާމަކޮށްފައި އެވެ.