
-
ބ. އަތޮޅު ހޮސްޕިޓަލުގެ އައު އިމާރާތުގެ އަމަލީ މަސައްކަތް މިއަދު ފަށައިފި އެވެ.

މި މަޝްރޫއުގެ އަމަލީ މަސައްކަތް ފައްޓަވައިދެއްވީ ސިއްޙީ ވުޒާރާގެ ވަޒީރު އަބްދުﷲ ނާޡިމް އިބްރާހީމްއެވެ. އަދި އަރިހުގައި އޭދަފުށި ކައުންސިލުގެ ރައީސް މުހައްމަދު ފާތިޙް އާއި މި މަޝްރޫއުގެ ކޮންޓްރެކްޓަރު އާރްޑީސީގެ ރޯޑް އެންޑް އިންފްރާސްޓްރަކްޗަރ ޑިވެލޮޕްމަންޓްގެ ޖެނެރަލް މެނޭޖަރ މުހައްމަދު ޝަރީފް އަދި އޭދަފުށި ހޮސްޕިޓަލުގެ މެނޭޖަރ މުހައްމަދު ޝަކީލް ވެސް ބައިވެރިވެވަޑައިގަތެވެ.
ބ. އަތޮޅު އޭދަފުށީގައި ހުންނަ އެ އަތޮޅު ހޮސްޕިޓަލުގެ އާ އިމާރާތް އަޅަން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ހަވާލުކޮށްފައިވަނީ ރައީސް ޑރ މުހައްމަދު މުއިއްޒު މިއަހަރުގެ އޮގަސްޓު މަހު ބ އަތޮޅަށް ކުރެއްވި ދަތުރުފުޅުގެ ތެރެއިން އޭދަފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވުނު ޖަލްސާގައި އެވެ.
އެ ބައްދަލުވުމުގައި ރައީސް މުއިއްޒު ވިދާޅުވީ ހޮސްޕިޓަލުގެ އާ އިމާރާތުގެ މަސައްކަތް ނިމުމުން އާބަން ސެންޓަރުތަކުގައި ހުންނަންވާ ފެންވަރަށް ސިއްހީ ހިދުމަތް އޭދަފުށިން ލިބޭނެ ކަމަށެވެ.
މި މަޝްރޫޢުގެ ދަށުން ބ. އޭދަފުށީގައި 50 އެނދުގެ މުޅިން އައު ހޮސްޕިޓަލެއް ތަރައްޤީ ކުރުމަށް ވަނީ ހަމަޖެހިފައެވެ. 181.7 މިލިޔަން ރުފިޔާގެ މިމަޝްރޫޢު އާރްޑީސީއާ ހަވާލުކޮށްފައިވަނީ، 540 ދުވަހުގެ ތެރޭގައި ނިންމާ ގޮތަށެވެ.







