-
ލަންކާއަށް މިފަހަކުން އެރި އެންމެ ގެއްލުންބޮޑު ތޫފާންކަމަށްވާ ތޫފާން ދިޓްވާގައި މަރުވި މީހުންގެ އަދަދު 123 އަށް އަރައި ލިބުނު ގެއްލުންތަކުން ގައުމު އަލުން އާރާސްތު ކުރުމަށް އެ ގައުމުގެ ރައީސް އަނޫރާ ކުމާރާ ދިސާނަޔަކަ ކުއްލި ނުރައްކަލުގެ ހާލަތު އިއުލާން ކުރައްވައިފި އެވެ.
ލަންކާގެ ނޫސްތަކުން ރިޕޯޓުކުރާގޮތުގައި ރައީސް އަނޫރާ ކުއްލި ނުރައްކަލުގެ ހާލަތު އިއުލާނުކުރައްވާފައިމިވަނީ ރިލީފް އޮޕަރޭޝަންތަކާއި، މީހުން ސަލާމަތް ކުރުމާއި، ރިހެބިލިޓޭޝަން މަސައްކަތް އަވަސްކުރުމަށް ހާއްސަ ގަވާއިދުތަކެއް ތަންފީޒު ކުރުމުގެ ބާރާއިއެކުގައި އެވެ.
މީގެ އިތުރުން ޒަރޫރީ ބޭނުންތަކަށް ބޭނުންވާ ޚިދުމަތްތައް ފޯރުކޮށްދިނުމާއި، އިމަޖެންސީ ފަންޑު ކަނޑައެޅުމާއި، ފުރާނައާއި މުދަލުގެ ރައްކާތެރިކަމަށް އަޅަންޖެހޭ ފިޔަވަޅުތައް އެޅުމުގެ ބާރުވެސް ކުއްލި ހާލަތު އިއުލާނުކުރުމާއިއެކު ރައީސަށް ލިބިގެންދާނެ އެވެ.
ލަންކާ ސަރުކާރުގެ އޮފިޝަލުން ވިދާޅުވާ ގޮތުގައި ކުއްލި ނުރައްކަލުގެ ހާލަތުގެ ގާނޫނުގެ ދަށުން އެހީ ފޯރުކޮށްދިނުމާއި، މީހުން ސަލާމާތްކުރުމަށް އެހީތެރިވުމާއި، ގެދޮރު ގެއްލިފައިވާ މީހުން ހިމާޔަތް ކުރުމާއި، ގައުމީ އަދި ބައިނަލްއަގުވާމީ އެހީ ކޯޑިނޭޓް ކުރުން ވަރަށް ބޮޑަށް ފަސޭހަވެގެންދާނެ އެވެ.
ތޫފާން ދިޓްވާގެ ސަބަބުން ފެންބޮޑުވުމާއި ބިންގަނޑު ކަނޑައިގެން ދިއުމާއި އިމާރާތްތައް ވެއްޓުމުގެ ހާދިސާތަކުގެ ސަބަބުން ގެއްލުން ލިބުނު ބައެއް ޑިސްޓްރިކްޓްތަކުގައި އަދިވެސް 130 އަށްވުރެ ގިނަ މީހުން ގެއްލިފައިވާ ކަމަށް ޑިޒާސްޓާ އޮފިޝަލުން ބުނެއެވެ. ބޯކޮށް ވާރޭވެހި މަގުތައް ހަލާކުވެ، ކަރަންޓާއި މުވާސަލާތީ ހިދުމަތްތައް ކެނޑިގެން ދިޔަ ނަމަވެސް މީހުން ހޯދުމުގެ މަސައްކަތް ދަނީ ކުރަމުންނެވެ.
މި ތޫފާނުގެ ސަބަބުން ލަންކާގެ ސެންޓްރަލް، ސަބަރަގަމުވާ، ނޯތު ވެސްޓަރން އަދި ނޯތު ސެންޓްރަލް ޕްރޮވިންސްތަކަށް ބޮޑެތި ގެއްލުންތަކެއް ލިބި، އެތައް ހާސް ބަޔަކު ގެދޮރު ދޫކޮށް ދާން ޖެހި، އަސާސީ ހިދުމަތްތަކަށް ބޮޑެތި ގެއްލުންތަކެއް ވަނީ ލިބިފަ އެވެ. ޓްރައި ފޯސަސް، ޕޮލިސް، ޑިޒާސްޓާ މެނޭޖްމަންޓް ސެންޓަރުގެ ޓީމުތަކާއި ވޮލަންޓިއަރުން ދަނީ އެކަހެރި ކޮމިއުނިޓީތަކާ ހަމައަށް ވާސިލުވުމަށް 24 ގަޑިއިރު މަސައްކަތް ކުރަމުންނެވެ.
އަދި މި އޮޕަރޭޝަންތައް އަދިވެސް ކުރިޔަށްދިޔުމާއިއެކު ފެންބޮޑުވުމުގެ ސަބަބުން މަރުވާ މީހުންގެ އަދަދު އިތުރުވާނެ ކަމަށް ކަމާބެހޭ ފަރާތްތަކުން ވަނީ ބުނެފަ އެވެ.
ފަހުގެ
