ސިޔާސީ ހިސާބު ޖެއްސެވުމުގެ ބަދަލުގަ ރައީސް އިސްކުރައްވަނީ ދިވެހިންގެ ހައްގުތައް: އިހްސާން

ރައީސް ޑރ. މުޢިއްޒަކީ ދިވެހިންގެ ހައްގުގައި ނަންގަވަން ޖެހިވަޑައިގަންނަވާ ނިންމެވުންތަކުގަ ސިޔާސީ ހިސާބު ޖައްސަވާ ބޭފުޅެއް ނޫން ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ސަރުކާރަށް 2 އަހަރުފުރުމާއި ގުޅިގެން ދައުލަތުގެ މީޑިއާއިން ގެނެސްދޭ "ހަފުތާ 104" ޕްރޮގްރާމްގައި ވާހަކަ ދައްކަވަމުންނެވެ.

މި ޕްރޮގްރާމުގައި ވާހަކަ ދައްކަވަމުން ވަޒީރު ވިދާޅުވީ ރައީސް ނިންމަވާ ކޮންމެ ނިންމެވުމަކީ ދިވެހިންގެ ހައްގުގައި ނިންމަވާ ނިންމުންތަކެއް ކަމަށާއި އޭގެ ތެރެއިން ގިނަ ނިންމެވުންތަކަކީ އެއްވެސް ވެރިއަކަށް މިހާތަނަށް ނިންމަވަން ކެރިވަޑައިނުގަތް ނިންމުންތަކެއް ކަމަށެވެ.

ސިޔާސީ ގޮތުން ކިތަންމެ ގެއްލުންތަކެއް ވީނަމަވެސް އޭރަކު ނިންމަވަން ޖެހިވަޑައިގަންނަވާ ކޮންމެ ނިންމެވުމެއް ރައީސް ނަންގަވާކަން ވަޒީރު ފާހަގަކުރެއްވިއެވެ.

ޖެނެރޭޝަނަލް ބޭންއާ ގުޅޭގޮތުން ވާހަކަ ދައްކަވަމުން ވަޒީރު ވިދާޅުވީ ރައީސް ބައްލަވަނީ ސިޔާސީ ފައިދާއަށްވުރެ ބޮޑަށް ރައްޔިތުންގެ ދުޅަހެޔޮކަން ކަށަވަރު ކުރުމަށް ކަމަށެވެ.

ދުންފަތުން ދުރުހެލިވެފައިވާ މުޖުތަމަޢުއެއް ބިނާކުރުމަށް މިއަދު ތަންފީޒް ކުރަން ފެށި "ޖެނެރޭޝަނަލް ބޭން އޮން ޓޮބޭކޯ"އަކީ އަދުގެ ޖީލުތަކަށާއި އަންނަން އޮތް އެތަކެއް ޖީލުތަކަށް އޭގެއިން ގިނަ ފައިދާތަކެއް ލިބޭނެ ކަމެއް ކަމަށް ގިނަބަޔަކު ދެކެއެވެ.