އެންޑީއޭ ވަޒީފާގައި ހުރެ ކްލައިންޓުންނަށް މަސްތުވާތަކެތި ދީގެން ނަހަމަ ގުޅުން ބާއްވަމުންދިޔަ ފަސީހު ހައްޔަރުކޮށްފި

ނެޝަނަލް ޑްރަގް އޭޖެންސީ, އެންޑީއޭގެ ޕިޔަރ މެންޓަރ ގެ ވަޒީފާގައި ހުރެ ކްލައިންޓުންނަށް މަސްތުވާތަކެތި ދީގެން ނަހަމަ ގުޅުން ބާއްވަމުންދިޔަ މުވައްޒަފަކު ހައްޔަރުކޮށްފި އެވެ.

ފުލުހުން މިއަދު ބުނީ އެންޑީއޭ އިން ފަރުވާ ހޯދާ ކްލައިންޓުންނަށް މަސްތުވާތަކެތި ދީގެން ނަހަމަ ގުޅުން ބާއްވާ ކަމަށް ތުހުމަތު ކުރެވޭ މައްސަލައެއް މިމަހުގެ 4 ވަނަ ދުވަހު އެންޑީއޭއިން ފުލުހުންނަށް ހުށަހަޅާފައިވާ ކަމަށެވެ.

އެގޮތުން މި މައްސަލައިގެ ތުހުމަތުގައި އެންޑީއޭގެ ޕިއާރ މެންޓާރ ގެ ވަޒީފާ އަދާކުރަމުންދިޔަ ސ ފޭދޫ ، ފްލޮރިޑާ އުމުރުން 52 އަހަރުގެ މުހައްމަދު ފަސީހު މިއަދުގެ ވަގުތެއްގައި ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށް ފުލުހުން ވަނީ ބުނެފައި އެވެ.

މި މައްސަލައިގެ އިތުރު ތަފްސީލެއް ހާމަކޮށްފައިނުވާއިރު ފުލުހުން ވަނީ މި މައްސަލަ ތަހުގީގު ކުރަމުންދާކަން ހާމަކޮށްފައެވެ.