18 އަހަރުން ދަށުގެ 3 ކުއްޖެއްގެ މެދުގައި ހަމަނުޖެހުމެއް: 16 އަހަރުގެ އެކަކު ހައްޔަރަށް!

ހުޅުމާލެ ފޭސް 2 ގައި 3 ކުއްޖެއްގެ ދެމެދުގައި ހަމަނުޖެހުމެއް ހިނގައިގެން ފުލުހުން ހަރަކާތްތެރިވެއްޖެ އެވެ.

ފުލުހުން މިރޭ ބުނީ ހުޅުމާލެ ފޭސް 2 ހިޔާ ޓަވަރު 9 ގައި ދެ ބައެއްގެ މެދުގައި އެކަކު އަނެކަކަށް އިންޒާރުދީ ހަމަނުޖެހުން އުފެއްދުމާއި ގުޅިގެން 3 ކުޑަކުދިން މައުލޫމާތު ސާފުކުރަން ހުއްޓުވާފައިވާ ކަމަށެވެ.

އަދި އޭގެ ތެރެއިން 16 އަހަރުގެ ފިރިހެން ކުއްޖަކު ފުލުހުންގެ ބެލުމުގެ ދަށަށް ގެނެސްފައިވާކަން ފުލުހުން ވަނީ ހާމަކޮށްފައި އެވެ.

މި ހަމަނުޖެހުމުގެ ތެރެއިން މާރާމާރީ ހިންގިކަމަށް ބައެއް ފަރާތްތަކުން ބުނަމުންދިޔަ ނަމަވެސް ފުލުހުން ވަނީ މާރާމާރީ ހިންގާފައި ނުވާކަމަށް ބުނެފައި އެވެ. އަދި ހަމަނުޖެހުމުގައި ތޫނު އެއްޗެއް ބޭނުންކޮށްފައި ނުވާކަމަށް މީޑިއާ އޮފިޝަލް ފުރަތަމަ ބުނި ނަމަވެސް ފަހުން ވަނީ މި ހަމަނުޖެހުން ހިނގި ސަރަހައްދުން ތޫނު އެއްޗެއް ފެނުނު ކަމަށް ބުނެފައި އެވެ.

މި މައްސަލައާއި ގުޅޭ އިތުރު ތަފްސީލެއް ފުލުހުން ހާމަނުކޮށް ބުނީ މި މައްސަލައާއި ގުޅގެން ބަލަންޖެހޭ ކަންކަން ބަލަމުންދާކަމަށެވެ.