ދިއްގަރު ހިއްކި ބިމުގެ ގޮނޑުދޮށް ޙިމާޔަތްކުރުމުގެ މަޝްރޫޢު ނިންމާލައިފި

މ. ދިއްގަރު ހިއްކި ބިމުގެ ގޮނޑުދޮށް ޙިމާޔަތްކުރުމުގެ މަޝްރޫޢުގެ ނިންމުން ފާހަގަކޮށްފިއެވެ.

މި މަސައްކަތުގެ ނިމުން ފާހަގަކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު މ އަތޮޅަށް ކުރައްވަމުން ގެންދަވާ ރަސްމީ ދަތުރުފުޚުގެ ތެރެއިން މިއަދު ދިއްގަރަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި އެވެ.

އެގޮތުން މި މަޝްރޫއުގެ ނިމުން ފާހަގަކޮށް އިންފްރާސްޓްރަކްޗަރ މިނިސްޓްރީން ވަނީ އެރަށު ކައުންސިލާއި ޚާއްސަ ފިލައެއް ހަވާލުކޮށްފައެވެ. މި ފިލާ ކައުންސިލާއި ހަވާލުކޮށްދެއްވީ މިނިސްޓަރު އަބްުދުالله މުއްތަލިބު އެވެ.

މި މަޝްރޫއަކީ ސަރުކާރުން 17،573،409.00 ރުފިޔާއަށް 323 ދުވަހުގެ ތެރޭގައި ނިންމާގޮތަށް އެމްޓީސީސީއާއި ހަވާލުކޮށްގެން ކުރިޔަށް ގެންދިޔަ މަޝްރޫއެކެވެ.

މި މަޝްރޫޢުގެ ދަށުން ނިންމާފައިވާ މައިގަނޑު މަސައްކަތްތަކުގެ ތެރޭގައި ހިމެނެނީ 700 މީޓަރުގެ ބޮޑުހިލައިގެ ވައި-ގްރޮއިން ޖެހުމާއި( 70 މީޓަރުގެ ދިހަ ގްރޮއިން) 138 މީޓަރުގެ ބޮޑުހިލައިގެ ބްރޭކްވޯޓަރ ޖެހުމާއި 332 މީޓަރުގެ ޖިއޯބޭގް ރިވެޓްމަންޓް ޖެހުމެވެ.