ލަންކާގެ ކުރީގެ ރައީސް ރަނިލް ކަފާލާތުގެ ދަށުން ދޫކޮށްލައިފި

ދައުލަތުގެ ފައިސާ އަމިއްލަ ކަންކަމުގައި ބޭނުން ކުރުމުގެ ތުހުމަތުގައި މިދިޔަ ހަފްތާ ބަންދުގައި ހައްޔަރުކުރި ސްރީލަންކާގެ ކުރީގެ ރައީސް އަދި ބޮޑުވަޒީރު ރަނިލް ވިކްރަމަސިންހަގެ ކަފާލާތުގެ ދަށުން ދޫކޮށްލައިފި އެވެ.

ދައުލަތުގެ ފައިސާ ނަހަމަ ގޮތުގައި ބޭނުންކުރި ކަމުގެ ތުހުމަތުގައި ބަންދުގެ ދަށުގައި ހުންނެވި ކުރީގެ ރައީސް ރަނިލް ކަފާލާތުގެ ދަށުން ދޫކޮށްލީ ކޮލަމްބޯ ފޯޓް މެޖިސްޓްރޭޓް ކޯޓުން މިއަދު ހަވީރު އެވެ.

ކޮލަމްބޯ ފޯޓް މެޖިސްޓްރޭޓް ކޯޓުން މިއަދު ރަނިލް ވިކްރަމަސިންހަ ދޫކޮށްލީ ފަސް މިލިއަން ރުޕީސްގެ ތިން ގެރެންޓީއަކަށެވެ.

މި މައްސަލަ ކޯޓުގައި ބެއްލެވީ ކޮލަމްބޯ ފޯޓްގެ މެޖިސްޓްރޭޓް ނިލުޕުލި ލަންކަޕޫރާއެވެ. ސިއްހީ ހާލަތު ހުރިގޮތުން ކުރީގެ ރައީސް އަމިއްލަފުޅަށް ކޯޓަށް ވަޑައިނުގެންނެވި ނަމަވެސް ކޮލަމްބޯ ނެޝަނަލް ހޮސްޕިޓަލްގެ އެޑްމިޓްކޮށްފައި އޮތް ރަނިލް އަޑުއެހުމުގައި ބައިވެރިވީ ޒޫމް މެދުވެރިކޮށެވެ.

ކުރީގެ ރައީސް ރަނިލް ވިކްރަމަސިންހަ މިދިޔަ ހުކުރު ދުވަހު ފުލުހުންގެ ބެލުމުގެ ދަށަށް ގެންގޮސް މިއަދުގެ ނިޔަލަށް ބަންދުގައި ބަހައްޓާފައިވަނީ އެމަނިކުފާނު ވެރިކަމުގައި ހުންނެވި ދުވަސްވަރު ގައުމުން ބޭރަށް ކުރެއްވި އަމިއްލަ ދަތުރުފުޅަކަށް ސަރުކާރުގެ ފައިސާއަށް ޚިޔާނާތްތެރިވި ކަމުގެ ތުހުމަތުގައެވެ.