އެފްއޭއެމް

ރާއްޖޭގެ ގައުމީ ފުޓްބޯޅަ ޓީމުގެ ކޯޗަކަށް ކުޅަދާނަ ކޯޗު މުހައްމަދު ޝިޔާޒް (މޯހަން) ހަމަޖައްސައިފި އެވެ.

މި ނިންމުން ނިންމާފައިވަނީ އެފްއޭއެމް ހިންގާ ކޮމިޓީގެ މިއަދުގެ ބައްދަލުވުމުގައި އެވެ. ބައްދަލުވުމަށްފަހު މިޑިއާތަކާއި އެފްއޭމުން ހިއްސާކުރި ބަޔާނެއްގައި ބުނީ ސީނިއާ ގައުމީ ފުޓްބޯޅަ ޓީމުން އަންނަ މަހު ސްރީ ލަންކާއާ ދެކޮޅަށް ކުޅެން ހަމަޖެހިފައި އޮތް ދެ މެޗާއި އޮކްޓޫބަރު މަހާއި ނޮވެމްބަރު މަހު އޭޝިއަން ކަޕް ކޮލިފައިންގައި ރާއްޖެ ކުޅޭ މެޗުތަކަށް ޓީމުގެ ކޯޗަކަށް މޯހަން ހަމަޖައްސަން ނިންމާފައިވާ ކަމަށެވެ. އެގޮތުން މޯހަންގެ ކޯޗުކަމުގައި ގައުމީ ޓީމުން އަންނަ މަހުގެ 6 އަދި 9 ގައި ލަންކާގައި މެޗުތަކެއް ކުޅުމަށް ތާވަލުކޮށްފައިވާއިރު އޭޝިއަން ކަޕް ކޮލިފައިންގައި އޮކްޓޫބަރު 9 ގައި ރަށުންބޭރުގައި ތަޖިކިސްތާނާއި ދެކޮޅަށް އަދި އެމަހުގެ 14 ވަަނަ ދުވަހު ރާއްޖޭގައި ތަޖިކިސްތާނާ ދެކޮޅަށް ކުޅޭނެ އެވެ. އަދި ނޮވެމްބަރު، 18 ގައި ރާއްޖޭގައި ފިލިޕީންސާ ދިވެހި ގައުމީ ޓީމު ބައްދަލުކުރާނެ އެވެ.

ގައުމީ ސީނިއާ ޓީމުގެ ކޯޗަކަށް މޯހަން ހަމަޖެއްސި އިރު ޒުވާން ޓީމުގެ ހެޑް ކޯޗަކަށް ސަބާޙް މުހައްމަދު ( ސޮބާ ) ހަމަޖައްސާފައިވާކަންވެސް އެފްއޭމުން މިރޭ ވަނީ ހާމަކޮށްފައި އެވެ. އެގޮތުން އަންނަ ސެޕްޓެމްބަރ މަހު ސްރީލަންކާގައި އޮންނަ ސާފް އަންޑަރ 17 ފުޓްބޯޅަ މުބާރާތާއި 17 އަހަރުން ދަށުގެ އޭޝިއަންކަޕް ކޮލިފައާރސްގައި ޒުވާން ޓީމަށް އިރުޝާދުދޭނީ ސޮބާއެވެ.

މީގެ އިތުރުން މިއަދުގެ އެކްސްކޯ ބައްދަލުވުމުގައި ރާއްޖޭގެ ގައުމީ ފުޓްސަލް ޓީމަށްވެސް ހެޑް ކޯޗަކު ވަނީ އައްޔަނުކޮށްފައި އެވެ. އެގޮތުން މިއަހަރުގެ ސެޕްޓެމްބަރ މަހު މިޔަންމާގައި އޮންނަ އޭއެފްސީ ފުޓްސަލް އޭޝިއަން ކަޕް ކޮލިފިކޭޝަންގައި ރާއްޖެ ކުޅެންޖެހޭ މެޗްތަކުގެ ހެޑްކޯޗްކަމަށް އަހްމަދު ނިޔާޒް ހަމަޖައްސަން ނިންމާފައިވާކަން އެފްއޭމުން ވަނީ ހާމަކޮށްފައި އެވެ.

ރާއްޖޭގެ ގައުމީ ފުޓްބޯޅަ އަދި ފުޓްސެލް ޓީމުތަކުގެ ކޯޗުންގެ މަގާމަށް މިރޭ ހަމަޖެއްސި ތިން ކޯޗުންނަކީވެސް ރާއްޖޭގައި މިވަގުތު ތިބި އެންމެ ކާމިޔާބު ކޯޗުންގެ ތެރެއިން 3 ކޯޗުންނެވެ.