ޗައިނާ ސަރުކާރުގެ ހިލޭ އެހީގެ ދަށުން އެޅުމަށް ހަމަޖެހިފައިވާ 50 ކައުންސިލް ޢިމާރާތުގެ ފިޒިބިލިޓީ ހެދުމުގެ މަސައްކަތް ފެށިގެން ކުރިޔަށް!

ޗައިނާ ސަރުކާރުގެ ހިލޭ އެހީގެ ދަށުން އެޅުމަށް ހަމަޖެހިފައިވާ 50 ކައުންސިލް ޢިމާރާތުގެ ފީޒިބިލިޓީ ހެދުމުގެ މަސައްކަތް ފެށިފައިވާކަން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން ހާމަކޮށްފި އެވެ.

އެވުޒާރާއިން އިއްޔެ ބުނީ ޗައިނާ ސަރުކާރުގެ ހިލޭ އެހީގެ ދަށުން އެޅުމަށް ހަމަޖެހިފައިވާ 50 ކައުންސިލް ޢިމާރާތުގެ ފިޒިބިލިޓީ ހެދުމުގެ މަސައްކަތް ފެށި މާލެ އަތޮޅުގެ ގުރައިދޫ، ހިންމަފުށި، ތުލުސްދޫ، ގާފަރު އަދި ކާށިދޫއަށް ޗައިނާގެ ޓެކްނިކަލް ޓީމުގެ ބޭފުޅުންނާއި، އެވުޒާރާގެ ޕްރޮޖެކްޓް ޑިޕާޓްމެންޓްގެ ބޭފުޅުން ޒިޔާރަތްކޮށް ފީޒިބިލިޓީ ހެދުމުގެ މަސައްކަތް ކުރިއަށް ގެންގޮސްފައިވާ ކަމަށެވެ.

މި ވަގުތު ޓީމުން މަސައްކަތްކުރަމުން އަންނަނީ ރ. އަތޮޅުގައެވެ. 50 ކައުންސިލް ޢިމާރާތުގެ ތެރޭގައި ރ. އަތޮޅު ވާދޫއާއި، ހުޅުދުއްފާރުގައި ކައުންސިލް އެޅުމަށް ހަމަޖެހިފައި ވެއެވެ.

ބާވެ ވީރާނާވެފައިވާ ކައުންސިލް ޢިމާރާތްތައް އަލުން ޢިމާރާތްކުރުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޚާއްޞަ އިސްކަމެއް ދެއްވައިގެން ކުރިއަށް ގެންދަވައި މަޝްރޫޢެކެވެ.

ޗައިނާ ސަރުކާރުގެ ހިލޭގެ އެހީގެ ދަށުން އެޅުމަށް ހަމަޖެހިފައިވާ 50 ކައުންސިލްގެ އިތުރުން، ކޮންޓްރެކްޓަރ ފައިނޭންސް އުޞޫލުން ވެސް 55 ކައުންސިލް ޢިމާރާތްކުރުމަށް ހަމަޖެހިފައި ވެއެވެ.