ގއ އަތޮޅުގެ ރައްޔިތުންގެ ކަންބޮޑުވުންތައް ސަރުކާރާއި ހިއްސާކޮށްފި

ހުވަދުއަތޮޅު އުތުރުބުރީ އަތޮޅު ކައުންސިލްގެ މެންބަރުންނާއި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ބައްދަލްކުރައްވައިފި އެވެ.

ހުވަދުއަތޮޅު އުތުރުބުރީ އަތޮޅު ކައުންސިލްގެ މެންބަރުންނާ ވަޒީރު ބައްދަލުކުރެއްވި އިއްޔެ އެވުޒާރާގައި އޮތް ބައްދަލުވުމެއްގައި އެވެ.

ކައުންސިލްތަކާއި ބެހޭ ވުޒާރާއިން ބުނީ މި ބައްދަލުވުމުގައި އަތޮޅުގެ ރަށްރަށުގެ ކައުންސިލް އިދާރާތައް ޢިމާރާތްކުރުމާ ބެހޭ ގޮތުންނާއި، އަތޮޅު ފިހާރަތަކުގެ ކުލީގެ ފައިސާއާ ބެހޭ ގޮތުންނާއި، ފިނޭންސް މިނިސްޓްރީން ބަޖެޓް ދޫކުރުމުގައި ހުރި ދަތިތަކާ ގުޅޭ ގޮތުން މަޝްވަރާކުރެވިފައިވާ ކަމަށެވެ. މީގެ އިތުރުން މި ބައްދަލުވުމުގައި އަތޮޅުގެ ބައެއް ރަށްރަށުގެ ކަރަންޓް ޚަރަދު ބޮޑުވާ މައްސަލައާއި، ބައެއް ރަށްރަށުގެ ޞިއްޙީ މަރުކަޒުތަކަށް ބޭނުންވާ ވަޞީލަތްތަކާ ބެހޭ ގޮތުންނާއި، ރަށްރަށުގެ ކުޅިވަރު ދަނޑުތަކުގައި ލައިޓުޖެހުމުގެ އިތުރުން ބައެއް ރަށްރަށުގެ ނަރުދަމާ ނިޒާމު ރަނގަޅުކުރުމާ ބެހޭ ގޮތުން ވެސް މަޝްވަރާކުރެވިފައިވެއެވެ.

މި ބައްދަލުވުމުގައި އެލްޖީ ޑިޕާޓްމެންޓުގެ ފަރާތުން ސްޓޭޓް މިނިސްޓަރ އަޙްމަދު ސާލިމާއި، ގއ. އަތޮޅު ހިމެނޭ ކުލަސްޓަރ ވިލަރެސްކޮށް ބަލަހައްޓަވައި ސްޓޭޓް މިނިސްޓަރ ޠާހާ ނަޢީމް މިނިސްޓަރގެ އަރިހުގައި ބައިވެރިވެވަޑައިގެންނެވިއެވެ.