މިއަދުން ފެށިގެން ރާއްޖެ އަންނަ ލަންކާ ރައްޔިތުންނަށް 90 ދުވަހުގެ އޮން-އެރައިވަލް ވިސާ ލިބޭނެ!

ރާއްޖެ އަންނަ ލަންކާ ރައްޔިތުންނަށް ރާއްޖެއިން 90 ދުވަހުގެ އޮން އެރައިވަލް ވިސާ ދިނުމަށް ނިންމައިފި އެވެ.

މޯލްޑިވްސް އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި ބުނީ މިއަދުން ފެށިގެން ސްރީލަންކާގެ ރައްޔިތުންނަށް ރާއްޖެއިން 90 ދުވަހުގެ އޮން އެރައިވަލް ވިސާ ހިލޭ ލިބޭނެ ކަމަށެވެ.

އަދި މި ނިންމުމަކީ ލަންކާގެ ރައީސް އަނޫރާ ކުމާރާ ޑިސަނަޔަކަ ރާއްޖެއަށް ކުރެއްވި ރަސްމީ ދަތުރުފުޅުގެ ތެރެއިން ރައީސް ޑރ މުހައްމަދު މުއިއްޒުއާއި ދެބޭފުޅުން ކުރިޔަށް ގެންދިޔަ ދެގައުމުގެ ރަސްމީ މަޝްވަރާތަކުގެ ތެރެއިން ނިންމެވި ނިންމެވުމެއް ކަމަށްވެސް އިމިގްރޭޝަނުން ވަނީ ބުނެފައި އެވެ.

އަދި 2025 ވަނަ އަހަރުގެ ޖެނުއަރީ މަހުން ފެށިގެން ދިވެހި ރައްޔިތުންނަށް ސްރީލަންކާއަށް އައުމުން 90 ދުވަހުގެ ވިސާ މިހާރު ލިބެމުންދާކަން ފާހަގަކޮށް އިމިގްރޭޝަނުން ބުނީ މި ނިންމުންތަކުން ދައްކުވައިދެނީ ދެ ގައުމުގެ ދެމެދުގައި އޮތް ބަދަހި ގުޅުން ކަމަށެވެ.

ސްރީލަންކާގެ ރައީސް ފުރަމާނަ ދަތުރުފުޅެއްގައި ރާއްޖެ ވަޑައިގެންނެވީ މިމަހުގެ 28 ވަނަ ދުވަހު އެވެ. ރާއްޖޭގެ 3 ދުވަސް ހޭދަކުރެއްވުމަށްފަހު ރައީސް އަނުރާ ދަތުރުފުޅު ނިންމަވާލެއްވުމަށްފަހު ފުރާވަޑައިގެންނެވީ މިރެއެވެ.