
-
ރާއްޖޭގެ އެންމެ ގިނަ އެއާޕޯޓު ހިންގަމުންދާ ރީޖަނަލް އެއާޕޯޓްސް ކޮމްޕެނީ ލިމިޓެޑް، އާރްސީއެލްގެ މެނޭޖިންގ ޑިރެކްޓަރުގެ މަގާމުގައި ހުންނެވި އަހުމަދު މުބީން އެމަގާމުން މިއަދު އިސްތިއުފާދެއްވައިފި އެވެ.

މުބީން، އާރްސީއެލްގެ އެމްޑީގެ މަގާމުން އިސްތިއުފާ ދެއްވިކަން ވަނީ ކަށަވަރުވެފައި އެވެ. އަދި އާރްސީއެލްއިންވެސް ވަނީ އެކުންފުނީގެ ސޯޝަލް މީޑިއާ އެކައުންޓްތަކުން ވެސް އޭނާ މަގާމުގައި ހުންނަވައި ކުރެއްވި މަސައްކަތްތަކަށް ޝުކުރު އަދާކުރައްވާފަ އެވެ.
މުބީން އިސްތިފާ ދެއްވި ސީދާ ސަބަބެއް އަދި މިހާތަނަށް ހާމަވެފައި ނުވާއިރު ދާދި ފަހުން އާރްސީއެލްއިންވަނީ މުބީން ކުންފުނިން ވަކިވުމުގެ ކުރީން ވަދާއީ ޕާޓީއެއްވެސް ބާއްވާފައި އެވެ.
މުބީން އިސްތިއުފާ ދެއްވި އިރު އާރްސީއެލް ރާއްޖޭގެ މައި އެއާޕޯޓު ހިންގާ ކުންުފުނި މޯލްޑިވްސް އެއާޕޯޓްސް ކޮމްޕެނީ ލިމިޓެޑާއި އެއްކޮއްްލުމުގެ މަސައްކަތް މިހާރު ދަނީ ކުރަމުންނެވެ. އެގޮތުން އެމްއޭސީއެލްއިން ވަނީ އާރްސީލް، އެކުންފުނީގެ ދަށަށް ގެނައުމުގެ މަސައްކަތް ކުރިޔަށް އޮތް ދެތިން މަހުގެ ތެރޭގައި ފުރިހަމަވާނެކަން ހާމަކޮށްފައި އެވެ.
ދައުލަތަށް ބުރައަކަށް ވާގޮތަށް ހިންގަމުން އައި ސަރުކާރުގެ ބައެއް ކުންފުނިތައް ބޮޑެތި ކުންފުނިތަކުގެ ދަށަށް ބަދަލުކުރުމަކީ މި ސަރުކާރުގެ އިގުތިސާދީ ސިޔާސަތުގެ ތެރޭގައި ހިމެނޭ ކަމެކެވެ. އެއީ، އިގުތިސާދީ ދަތިތަކުން އަރައިގަތުމަށް ޚަރަދު ކުޑަކުރަން ކަނޑައެޅި ސިޔާސަތެކެވެ.