ހުޅުމާލޭގައި ތަރައްޤީކުރި ކޯޓު އިމާރާތް މިއަދު ހުޅުވަނީ

ހުޅުމާލޭގައި ތަރައްގީކުރި ކޯޓު އިމާާރާތް މިއަދު ހުޅުވުމަށް ތައްޔާރުވެއްޖެ އެވެ.

ހުޅުމާލޭގައި ތަރައްޤީކުރި މި އިމާރާތަކީ ސުޕީރިއާ ކޯޓު ކޮމްޕްލެކްސް އިމާރާތްކުރެވެންދެން ކޯޓުތަކުގެ ޖާގައިގެ ދަތިކަމަށް މިވަގުތަށް ހައްލުހޯދައިދިނުމަށް ތައްޔާރުކުރި އިމާރާތެކެވެ.

މި އިމާރާތް ހުޅުވުމުގެ ރަސްމިއްޔާތު އޮންނާނީ މިއަދު މެންދުރު ފަހު އެވެ. އެގޮތުން މި ރަސްމިއްޔާތު ޝަރަފުވެރިކޮށްދެއްވައި އެ އިމާރާތް ރަސްމީކޮށް ހުޅުއްވައި ދެއްވާނީ ރައީސުލްޖުމްހުރިއްޔާ ޑރ މުހައްމަދު މުއިއްޒު އެވެ.

މި އިމާރާތާއިއެކު ކްރިމިނަލް ކޯޓާއި ޑްރަގް ކޯޓުގެ ޖާގައިގެ ދަތިތަކަށް ހައްލު ލިބިގެންދާނެކަމަށް އެޗްޑީސީން ބުނެއެވެ.

ކްރިމިނަލް ކޯޓު ހިންގަމުންދާ އިމާރާތް ބާވެ، ބައެއް ކޯޓު ރޫމްތައް ބޭނުން ނުކުރެވޭވަރުވުމުން އެ ކޯޓުގެ ހަ ސެކްޝަނެއް ވަނީ ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމަރާތަށް ބަދަލުކޮށްފައެވެ.