ސްރީލަންކާގެ އެންމެ މަތީ ޝަރަފު މޯދީއަށް އަރުވައިފި

އިންޑިއާގެ ބޮޑުވަޒީރު ނަރެންދުރަ މޯދީއަށް ލަންކާ ސަރުކާރުން ބޭރުގެ ލީޑަރުންނަށް އަރުވާ އެންމެ މަތީ ޝަރަފު އަރުވައިފި އެވެ.

ލަންކާގެ މިތުރާ ވިބުޝާނާ އެވޯޑް މޯދީއަށް އަރުވާފައިވަނީ މިހާރު މޯދީ ލަންކާއަށް ކުރައްވަމުންދާ ރަސްމީ ދަތުރުފުޅުގެ ތެރެއިން މިއަދު އެގައުމުގެ ރައީސް އޮފީހުގައި ބޭއްވި ޚާއްސަ ރަސްމިއްޔަތެއްގައި އެވެ. އެގޮތުން މި ޝަރަފު މޯދީއަށް އެރެއްވީ ލަންކަގެ ރައީސް އަނޫރާ ކުމާރާ ޑިސަނަޔަކަ އެވެ.

މި ޝަރަފަކީ އިންޑިއާގެ ބޮޑުވަޒީރު ނަރެންދުރަ މޯދީ ސްރީލަންކާގެ ރައްޔިތުންނަށް ދެއްވަމުން ގެންދަވާ އެއްބާރުލެއްވުމުގެ އަގު ވަޒަންކުރުމުގެ ގޮތުން އެރުވި ޝަރަފެއް ކަމަށް ރައީސް އަނޫރާ ކުމާރާ ޑިސަނަޔަކަ ވިދާޅުވިއެވެ.

މި ރަސްމިއްޔާތު އޮތީ ލަންކާގެ މިއަދު ޕްރެޒިޑެންޝަލް ސެކްރެޓޭރިއޭޓްގައި އިންޑޯ-ލަންކާ ގުޅިގެން ހިންގާ ގިނަ މަޝްރޫއުތަކެއް އިފްތިތާހު ކުރުމަށްފަހުގައި އެވެ. މީގެ އިތުރުން ދެގަުއުމުގެ ލީޑަރުން ވަނީ އިންޑިއާ-ލަންކާ ގުޅިގެން ކުރިއަށް ގެންދާ ގިނަ މަޝްރޫއުތަކެއް ވާޗުއަލްކޮށް ބައްލަވާލައްވާފައެވެ.

މިއަދު ލަންކާއާއި އިންޑިއާއި ދެމެދުު ގިނަ އެއްބަސްވުންތަކެއްގައި ސޮއިކުރެވުނު އިރު އޭގެ ތެރޭގައި އުމްރާނީ، އިޖްތިމާއީ، ޓެކްނޮލިޖީ އަދި އަސްކަރީ ގުޅުންތައް ވަރުގަދަ ކުރުމުގެ އެއްބަސްވުންތައް ހިމެނެއެވެ.