ހުޅުމާލެއިން ގިނަ އަދަދެއްގެ ބަނގުރާ އަތުލައިގަނެ އެކަކު ހައްޔަރަށް!

ހުޅުމާލެއިން ގިނަ އަދަދެއްގެ ބަނގުރާ ފުޅިތަކެއް އަތުލައިގެންފި އެވެ.

ފުލުހުން މިރޭ ބުނީ ބަނގުރާ ކަމަށް ޝައްަކު ކުރެވޭ އެއްޗެއް ހުރި ފުޅިތަކެއް އަޅާފައި ހުރި ފޮށިތަކެއް އަރުވައިގެން ވޭނެއް ހުޅުމާލެއަށް ދަތުރުކުރާ ކަމަށް ފުލުހުންނަށް ލިބުނު މައުލޫމާތަކާއި ގުޅިގެން އެވޭން މިރޭ 21:46 އެހާކަންހާއިރު ހުޅުމާލެ ރީތިގަސް މަގުން ހުއްޓުވައި ބަލާފާސްކުރި ކަމަށެވެ.

އެގޮތުން ބަލާފާސްކުރި އިރު އެވޭނުން ބަނގުރާ ކަމަށް ބެލެވޭ އެއްޗެއް ހުރި ގިނަ އަދަދެއްގެ 500 އެމްއެލް ގެ ފުޅި ފެނިފައިވާ ކަމަށާއި ޖުމުލަ އޭގެ 75 ފުޅި ފެނިފައިވާ ކަމަށް ފުލުހުން ބުނެއެވެ.

މި މައްސަލަ އާއި ގުޅިގެން ފުލުހުން ވަނީ ވޭން ދުއްވަން އިން މީހާ ހައްޔަރުކޮށްފައި އެވެ. ވޭން ދުއްވަން އިނީ ނޭޕަލް އަށް ނިސްބަތްވާ އުމުރުން 37 އަހަރުގެ ތިރްތާ ބަހާދުރު ކަމަށް ފުލުހުން ބުނެއެވެ.

އޭނާ ހައްޔަރުކުރުމުގެ އިތުރުން ފުލުހުން ވަނީ މިތަކެތި އަތުލައިގަތް ވޭން ޓޯ ކޮށްފައެވެ.