މަންދީ ގަޔަށް ކަޅު ތެޔޮ ޖެހި ކަމުގެ ތުހުމަތުގައި ޒުވާނަކު ހައްޔަރަށް!

އެމް.ޑީ.ޕީގެ އެކްޓިވިސްޓް މަރިޔަމް ޒުބައިރު ( މަންދީ ) ގަޔަށް ކަޅު ތެޔޮ ޖެހި މައްސަލައާއި ގުޅިގެން ޒުވާނަކު ހައްޔަރުކޮށްފި އެވެ.

މަންދީ ގަޔަށް ކަޅު ތެޔޮޖަހާފައިވަނީ މިމަހުގެ 16 ވަނަ ދުވަހުުގެ ރޭ މަންދީއާއި އިތުރު މީހަކު ސައިކަލެއްގައި ދަނިކޮށް އެހެން ސައިކަލެއްގައި ދިޔަ މޫނު ނިވާކޮށްގެން ތިބި ބަޔެކެވެ.

މިމައްސަލައާއި ގުޅިގެން ފުލުހުން މިއަދު މިޑިއާތަކަށް ފޮނުވި މެސެޖެއްގައި ބުނީ މާލެ ކަލާފާނު ހިނގުމުން ސައިކަލެއްގައި ދުއްވާފައި ދިޔަ މީހެއްގެ ގަޔަށް އެހެން ސައިކަލެއްގައި ދިޔަ ދެމީހަކު ކަޅު ތެޔޮ ޖެހި މައްސަލައިގެ ތުހުމަތުގައި ގދ ދާންދޫ ސަލްޓަން ވިލާ އުމުރުން 20 އަހަރުގެ އަހުމަދު ރިޝްމާހު ކޯޓު އަމުރެއްގެ ދަށުން މިމަހުގެ 27 ވަނަ ދުވަހު ހައްޔަރުކޮށްފައިވާ ކަމަށެވެ.

އަދި އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރަން ކޯޓުން އަމުރުކޮށްފައިވާ ކަމަށްވެސް ފުލުހުން ބުނެއެވެ.

މަންދީގެ ގަޔަށް ކަޅު ތެޔޮ ޖެހި ދުވަސްވަރަކީ، ރައީސުލްޖުމްހުރިއްޔާގެ ދަރިކަލަކަށް ނިސްބަތްކޮށް ވާހަކަ ދެއްކި މައްސަލާގައި މަންދީގެ މައްޗަށް ދައުވާކުރަން ރައީސްގެ އާއިލާ އިން ނިންމައި މަންދީއަަށް ގިނަ ބަޔެއްގެ ފާޑުކިޔުން އަމާޒުވަމުން ދިޔަ ދުވަސްވަރެކެވެ. މިއާއިއެކު އެފަދަ ދަނޑިވަޅެއްގައި މަންދީ ގަޔަށް ބަޔަކު ކަޅުތެޔޮ ޖެހުން އިދިކޮޅުން ސިފަކުރަމުންދަނީ އެއީ މިސަރުކާރުގެ ބަޔަކު ކުރި ކަމެއް ކަމެއްގެ ގޮތުގައި އެވެ.

ރައީސްގެ އާއިލާއިން މަންދީއާއި ދެކޮޅަށް މަދަނީ ދައުވާއެއް ކުރަން ނިންމާފައިވާ އެމްޑީޕީގެ މުޒާހަރާއެއްގައި މަންދީ ރާއްޖޭގައި ވޭޕް ބޭނުންކުރުން މަނާކުރީ ރައީސްގެ ދޮށީ ފިރިހެން ދަރިކަލުން ވޭޕް ބޭނުންކުރުމުން ކަމަށް ތުހުމަތު ކުރުމާއި ގުޅިގެންނެވެ. ދައުވާކުރަން ނިންމިކަން ހާމަކޮށް ފަސްޓްލޭޑީ ނެރުއްވި ބަޔާނެއްގައި ވަނީ މަންދީގެ މި ތުހުމަތުތައް ދޮގުކުރައްވާފައި އެވެ.