އިޒްރޭލުގެ މައި އެއާޕޯޓާއި އަސްކަރީ ބޭސްއަކަށް ހޫތީންގެ ހަމަލާތަކެއް: ދެ ބެލިސްޓިކް މިސައިލް ފޮނުވާލި!

އިޒްރޭލަށް މިއަދު ވައިގެ ހަމަލާތަކެއް ދިންކަން ޔަމަނުގެ ހޫތީން ކަށަވަރުކޮށްދީފި އެވެ.

ޔަމަނުން ވައިގެ ހަމަލާތަކެއް ދިން ކަމަށް މިއަދު ހަވީރުގެ ވަގުތެއްގައި އިޒްރޭލުން ވަނީ ބުނެފައި އެވެ. ނަމަވެސް ހަމަލާތައް ނާކާމިޔާބުކޮށްލިކަމަށް ޔަހޫދީން ބުނެއެވެ. މި ހަމަލާތަކާއި ގުޅިގެން އިޒްރޭލުގެ ސެކިއުރިޓީ ވަރުގަދަ ސަރަހައްދުތަކުގައި ސައިރެންގެ އަޑުތައް އިވުނު ކަމަށް އިޒްރޭލުގެ މީޑިއާތަކުން ވެސް ވަނީ ރިޕޯޓުކޮށްފައި އެވެ.

މި ހަމަލާތަކާއި ގުޅިގެން ހޫތީން ނެރުނު ރަސްމީ ބަޔާނުގައި ބުނީ އިޒްރޭލުގެ އަމާޒުތަކަށް މިއަދު ދިން ހަމަލާތަކަކީ ނިކަމެތި ފަލަސްތީނުގެ ރައްޔިތުންނަށް ތާއީދުކުރުމުގެ ގޮތުން ދިން ހަމަލާތަކެއް ކަމަށާއި އެ އޮޕަރޭޝަންގައި ފޮނުވާލި ހަމަލާތައް ކާމިޔާބުކަމާ އެކު އަމާޒަށް ވާސިލްވެފައިވާ ކަމަށެވެ.

އެގޮތުން ބަޔާނުގައި ބުނެފައި ވަނީ ހަމަލާތައް އަމާޒުކުރީ އިޒްރޭލުގެ ވެރިރަށް ތެލް އަވީވްގެ ބެން ގުރިއަން އެއާޕޯޓާއި އިޒްރޭލުގެ ދެކުނުގައި އޮންނަ "އަސްކަރީ ބޭސްއަކަށް" ކަމަށެވެ.

ރަތް ކަނޑުގައި ހަރަކާތެރިވަމުންދާ އެމެރިކާގެ މަތިންދާބޯޓު އުފުލާ އުޅަނދު ޓްރޫމަންނަށް ވެސް ބެލިސްޓިކް އަދި ކްރޫޒް މިސައިލާއި ޑްރޯން ބޭނުންކޮށްގެން ހަމަލާ ދީފައިވާ ކަމަށް ވެސް އެ ޖަމާއަތުން ވަނީ ބުނެފަ އެވެ.