logoEN
Sto top
ޝަމްއާންގެ އަނބިކަނބަލުންގެ ފޯނު ހިފަހައްޓައި އިމިގްރޭޝަންގެ ދެ މުވައްޒަފަކު ފުރުން މަނާކޮށްފި

ޝަމްއާންގެ އަނބިކަނބަލުންގެ ފޯނު ހިފަހައްޓައި އިމިގްރޭޝަންގެ ދެ މުވައްޒަފަކު ފުރުން މަނާކޮށްފި

އަހުމަދު ޝުރާއު

logo

3/23/2025, 9:06:17 AM

# މޯލްޑިވްސް އިމިގްރޭޝަން

--

އިމިގްރޭޝަންގެ ކޮރަޕްޝަން މައްސަލައާއި ގުޅިގެން ހައްޔަރުކުރި އިމިގްރޭޝަންގެ ކުރީގެ ކޮންޓްރޯލަރު ޝަމްއާން ވަހީދުގެ އާއިލީ މެމްބަރެއްގެ ފޯނު ހިފަހައްޓައި އިތުރު ދެ އޮފިސަރެއް ފުރުން މަނާކޮށްފި އެވެ.

Wamco

މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައެއް ފުލުހުން ބަލަން ފެށީ މިދިޔަ ހަފްތާގެ ތެރޭގައި އެވެ. އެގޮތުން މި މައްސަލަ އާއި ގުޅިގެން އިމިގްރޭޝަންގެ ކޮންޓްރޯލަރު ކަމުގެ މިދިޔަ ބުރާސްފަތި ދުވަހު ވަކިކުރި ޝަމްއާން ވަހީދު ހައްޔަރުކޮށްފައިވާއިރު އިމިގްރޭޝަންގެ އިތުރު 3 އޮފިސަރަކުވެސް ވަނީ ހައްޔަރުކޮށްފައި އެވެ.

މި މައްސަލައާއި ގުޅިގެން މިއަދު މިޑީއާތަކަށް ފޮނުވި މެސެޖެއްގައި ފުލުހުން ބުނީ އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރީންގެ އަތުން ނާޖާއިޒު މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައާއި ގުޅިގެން ކޯޓު އަމުރެއްގެ ދަށުން ދެމީހަކު ފުރުން މަނާކޮށްފައިވާ ކަމަށެވެ. އަދި ޝަމްއާންގެ އާއިލީ މެމްބަރެއްގެ ފޯނު ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

އިތުރުބާރު ހުރި މަސްދަރަކުން ގާފޫ ނޫހަށް ކަށަވަރުވެފައިވާ ގޮތުގައި ފޯނު ހަފަހައްޓާފައިވަނީ ޝަމްއާންގެ އަނބިކަނބަލުންގެ އެވެ. އަދި ފުރުން މަނާކުރި ދެ މީހުންނަކީ އިމިގްރޭޝަންގެ ދެ އޮފިސަރުން ކަންވެސް ވަނީ ކަށަވަރުވެފައި އެވެ.

ފުލުހުން މިދިޔަ ހުކުރު ދުވަހުގެ ރޭ ނެރުނު ބަޔާނެއްގައި ބުނީ އިމިގްރޭޝަންގެ ޓާސްކް ފޯސް އަދި ރިސްކް މެނޭޖްމަންޓް ސެކްޝަން ފިޔަވައި، އެހެން ސެކްޝަންތަކެއްގައި މަސައްކަތްކުރާ މުވައްޒަފުންތަކެއް، އެމުވައްޒަފުންގެ މަގާމުގެ ނުފޫޒު ނަހަމަ ގޮތުގައި ބޭނުންކޮށްގެން ބިދޭސީން ދިރިއުޅެމުންދިޔަ ގެއެއް ބަލާފާސްކޮށްފައިވާ ކަމަށާއި އެގެއިން އިމިގްރޭޝަންގެ ބެލުމުގެ ދަށަށް ބިދޭސީން ގެންދިޔައީ ގިނަ އަދަދެއްގެ ފައިސާއާއެކު ކަމަށެވެ. އަދި، އޭގެ އެއް ދުވަސްފަހުން، ޝަމްއާންގެ އަމުރަށް އެތަނުން 530،000 ރުފިޔާއާއެކު ޑިޓެންޝަނަށް ގެންދެވުނު ބިދޭސީއަކު، ދަންވަރުގެ ވަގުތެއްގައި ބަންދުން ދޫކޮށްލާފައިވާ ކަމަށް ފުލުހުން ބުނެ އެވެ. މި ބިދޭސީން ހައްޔަރުކުރި ގެ ބަލާފާސްކުރުމުގައި އަމަލީގޮތުން ބައިވެރިވި އިމިގްރޭޝަންގެ މުވައްޒަފެއް، ބަންދުން ދޫކޮށްލި ބިދޭސީ މީހާއާ މަގުމަތިން ބައްދަލުކޮށް، އޭނާގެ އަތުގައި ހުރި ފައިސާތައް ހޯދައި، އެފައިސާތައް ހިފައިގެން ޝަމްއާން ދިރިއުޅުއްވަމުން ގެންދެވި އިމާރާތަށް ވަދެފައިވާކަން އެނގިފައިވާކަމަށްވެސް ފުލުހުންގެ ބަޔާނުގައި ވަނީ ބުނެފައި އެވެ.

އަދި މި މައްސަލައާ ގުޅިގެން ކޯޓުގެ އަމުރެއްގެ ދަށުން ފަސް މީހަކު ހުއްޓުވައި ބަލާ ފާސްކޮށް އެމީހުންގެ އަތުން އިލެކްޓްރޯނިކް ސާމާނުތަކެއް ހޯދާފައިވާ ކަން ފާހަގަކޮށް ފުލުހުން ބުނީ ޝަމްއާން ދިރިއުޅުއްވާ ގެއިންވެސް ގިނަ އަދަދެއްގެ ފައިސާއާއި އިލެކްޓްރޯނިކް ސާމާނުތައް، ހޯދާފައިވާ ކަމަށެވެ. ނަމަވެސް ޝަމްއާންގެ ގެއިން ފުލުހުން ހޯދި ފައިސާގެ އަދަދެއް ހާމައެއް ނުކުރެއެވެ. މީގެއިތުރުން ކޯޓު އަމުރެއްގެ ދަށުން މި މައްސަލައިގައި ތުހުމަތުކުރެވޭ ތިން މީހަކު ހައްޔަރުކޮށްފައިވާ ކަމަށްވެސް ފުލުހުން ވަނީ ބުނެފަ އެވެ.

މި މައްސަލައާއި ގުޅިގެން ޝަމްއާން ކުއްލި ގޮތަކަށް މިދިޔަ ބުރާސްފަތި ދުވަހުގެ ރޭ ވަނީ މަގާމުން ވަކިކޮށްފައި އެވެ.

Maldivian
ކޮމެންޓް
Maldivian
ފަހުގެ
STELCO Inside