ފުލުހުންގެ ވިލިތަރި ޤުރުއާން މުބާރާތް ނިންމާލައިފި

'ވިލިތަރި ޤުރުޢާން' މުބާރާތް ނިންމައި ވަނަ ވަނައަށް ހޮވުނު ބައިވެރިންނަށް އިނާމު ދިނުމުގެ ރަސްމިއްޔާތު ބާއްވައިފިއެވެ.

މިއީ ވިލިމާލެ ޕޮލިހުން އިންތިޒާމްކޮށްގެން މި ރަމަޟާން މަހު ވިލިމާލޭގައި ބޭއްވި މުބާރާތެކެވެ.

މިމަހުގެ 21 ވަނަ ދުވަހުގެރޭ ވިލިމާލޭގައި ބޭއްވި ރަސްމިއްޔާތު ޝަރަފްވެރިކޮށްދެއްވާފައިވަނީ ކޮމިޝަނަރ އޮފް ޕޮލިސް ޢަލީ ސުޖާޢުއެވެ. މި ރަސްމިއްޔާތުގައި މާލެ ޕޮލިސް ހެޑް، އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲ އާއި ފުލުހުންގެ ސީނިއަރ ބައެއް އޮފިސަރުންނާއި ދަރިވަރުންގެ ބެލެނިވެރިން ބައިވެރިވެލެއްވިއެވެ.

މިރަސްމިއްޔާތުގައި ކޮމިޝަނަރ އޮފް ޕޮލިސް ޢަލީ ސުޖާޢު ދެއްކެވި ވާހަކަފުޅުގައި ވިލިމާލޭގައި ދިރިއުޅެމުންދާ ކުދިންނަށް އަމާޒުކޮށްގެން އެކުދިން ޤުރުއާނަށް އޮންނަ ލޯބި އިތުރުކޮށް ކުދިންގެ ޝައުގުވެރިކަން އިތުރު ކުރުމަށްޓަކައި މަސައްކަތްތަކެއް ފުލުހުން ކުރިއަށް ގެންދާކަމީ ލިބުނު ވަރަށް ބޮޑު ހިތްހަމަޖެހުމެއްކަމަށާއި މިމުބާރާތް ކޮންމެ އަހަރަކުވެސް ބޭއްވޭ މުބާރާތަކަށް ވެގެންދާނެކަމަށް އުއްމީދުކުރައްވާ ކަމަށް ވިދާޅުވިއެވެ.

އަދި ފުލުހުން ގާއިމްވެފައިވާ ހުރިހާ ރަށެއްގައި ހިންގާ މިފަދަ މުބާރާތްތަކަށް ފުލުހުންގެ އެހީތެރިކަން ދީފައިވާކަން ފާހަގަކުރައްވައި، ހާއްސަކޮށް ކުދިންގެ މެދުގައި އެކި ހުނަރުތައް ކުރިއެރުވުމަށްޓަކައި ފުލުހުންގެ އާންމު މަސައްކަތުގެ އިތުރުން ލިބޭ ވަގުތުތަކުގައި މިފަދަ ކަންކަން ކުރަމުންދާކަމަށް ވިދާޅުވިއެވެ.

މީގެއިތުރުން ފުލުހުން ހިދުމަތްދޭ ހުރިހާ ރަށެއްގައި މުޖުތަމައުއާ ގުޅިގެން ހިންގާ ހަރަކާތްތަކާއި ފުލުހުންގެ ކުރިއެރުމަށް ހިންގޭ ހަރަކާތްތައް ދުރާލައި ރޭވި ކަލަންޑަރ ކުރެވިފައިވާކަމަށާއި ރާއްޖޭގެ ކޮންމެ ރަށެއްގައި ފުލުހުންގެ ހަރަކާތެއް ކުރިއަށްދާނަމަ ނުވަތަ މިފަދަ ހަރަކާތްތައް ކުރިއަށްދާނަމަ އެކަން ބަލާލެވޭނެ އިންތިޒާމް ގާއިމްކުރެވިފައިވާ ކަމަށް ވިދާޅުވިއެވެ.

މި ރަސްމިއްޔާތުގައި ވަނީ ކޮންމެ އުމުރު ފުރާއިން ބަލައިގެން ކިޔެވުމުގެ ގޮފިންނާއި ނުބަލާ ކިޔެވުމުގެ ގޮފިން ވަނަތަކަށް ހޮވުނު ކުދިންނަށް ހަނދާނީ ލިޔުމާއި ފައިސާގެ އިނާމު އަދި މުޅި މުބާރާތުން ދެ ގޮފިން ވަނަތަކަށް ހޮވުނު ކުދިންނަށް ހަނދާނީ ފިލަޔާއި ފައިސާގެ އިނާމު ހަވާލުކޮށްފައެވެ. އަދި މި ރަސްމިއްޔާތުގައި ވަނީ މުބާރާތުގައި ފަޑިޔާރުކަން ކޮށްދެއްވި ފަރާތްތަކަށާއި މުބާރާތަށް އެކި ގޮތްގޮތުން އެހީތެރިކަން ފޯރުކޮށްދެއްވާފައިވާ ފަރާތްތަކަށް ހަނދާނީ ލިޔުން ދީފައެވެ.

ވިލިމާލެ ޕޮލިހުން އިންތިޒާމުކޮށްގެން މި މަހު 18 އިން 19 އަށް ބޭއްވި މި މުބާރާތުގައި 95 ކުދިން ބައިވެރިވެއެވެ. އެއީ ތިން އަހަރާއި ފަސް އަހަރާ ދެމެދުގެ އުމުރު ފުރާގެ 24 ކުދިންނާއި ހަ އަހަރާއި ނުވަ އަހަރާ ދެމެދުގެ އުމުރުފުރާގެ 36 ކުދިންނާއި 10 އަހަރާއި 13 އަހަރާ ދެމެދުގެ އުމުރުފުރާގެ 24 ކުދިންގެ އިތުރުން 14އަހަރާއި 17 އަހަރާ ދެމެދުގެ އުމުރުފުރާގެ 11 ކުދިންނެވެ.