24 އަހަރުން ދަށުގެ ޒުވާނުންނަށް އިންޖިނިއަރިންގެ ދާއިރާއިން ކިޔަވަން ސްޓެލްކޯއިން ސްކޮލަޝިޕްތަކެއް!

ސްޓެލްކޯ މެރިޓް ބޭސްޑް އިންޖިނިއަރިން ސްކޮލަޝިޕް ސްކީމްގެ ދަށުން އިނގިރޭސިވިލާތުން ތައުލީމް ހާސިލް ކުރުމަށް ޝައުގުވެރިވާ ފަރާތްތަކަށް ހާއްސަ ސްކޮލަޝިޕެއް ހުޅުވާލައިފި އެވެ.

ސްޓެލްކޯގެ މެރިޓް ބޭސްޑް އިންޖިނިއަރިންގ ސްކޮލަރޝިޕް ޕްރޮގްރާމް ގުޅޭގޮތުން އެކުންފުނިން އިއްޔެ ގެޒެޓު ކުރި އިޢުލާނުގައި ބުނެފައިވަނީ، ސްކޮލަރޝިޕް ޕްރޮގްރާމްގެ ކޯސްތަކުގެ ލެވެލްއަކީ ބެޗްލަރސް ޑިގްރީ އަދި (އަންޑަރ ގްރެޖުއޭޓް) ކަމަށެވެ. މި ސްކޮލަރޝިޕް ޕްރޮގްރާމްގެ ދަށުން ކިޔެވުމުގެ ފުރުޞަތު ލިބޭނީ ޔުނައިޓެޑް ކޮންގްޑަމް (ޔޫކޭ)ގައި ކަމަށްވެސް ސްޓެލްކޯއިން ވަނީ ބުނެފައެވެ. މިކޯސްތަކަށް ކަނޑައަޅާފައިވާ ދާޢިރާތަކަކީ، އިލެކްޓްރިކަލް އެންޑް އިލެކްޓްރޯނިކް އިންޖިނިއަރިން 1 ޖާގަ އަދި މެކޭނިކަލް އިންޖިނިއަރިންގ އަށް 2 ޖާގައެވެ.

މި ކޯސް ފުރިހަމަ ކުރުމަށް ޔޫކޭގެ ދަ ޔުނިވާސިޓީ އޮފް މެންޗަސްޓާ އާއި ޔުނިވާސިޓީ އޮފް ލީޑްގެ އިތުރުން ޔުނިވާސިޓީ އޮފް ސައުތެމްޓަން ހިޔާރު ކުރެވޭނެ އެވެ. މި ކޯހުގައި ބައިވެރިވެވޭ ޝަރުތުތަކުގެ ތެރޭގައި އުމުރުން 24 އަހަރުން ދަށުގެ ދިވެހި ރައްޔިތަކަށް ވުން ހިމެނެ އެވެ. މީގެ އިތުރުން ހިސާބާއި ފިޒިކްސް ނުވަތަ ކެމިސްޓްރީ އާއި ކޮމްޕިއުޓާ ސައިންސް ހިމެނޭހެން އޭ ލެވެލްގައި ދެ އޭސްޓާ އަދި އޭ ފާހެއް ހޯދާފައިވުން ނުވަތަ އެއާ އެއްވަރުގެ އައިބީ ސެޓްފިކޭޝަނެއް އޮތް މީހަކަށްވުމަކީވެސް ޝަރުތެކެވެ.

މި ސްކޮލަޝިޕް ކޯސް ފެށުމުގެ ކުރިން 6 މަސް ދުވަހުގެ އިންޓާންޝިޕް ޕްރޮގްރާމް ކާމިޔާބުކަމާއެކު ފުރިހަމަކުރަން ޖެހެ އެވެ. ނަމަވެސް ކޯސް ފަށާ ތާރީހަށް ބެލުމަށްފަހު އިންޓާންޝިޕްގެ މުއްދަތު ހަމަޖެއްސުމުގެ އިހްތިޔާރު ސްޓެލްކޯއަށް ލިބިގެންވެއެވެ. ސްޓެލްކޯއިން ބުނީ އެ ފުރުސަތުގެ ދަށުން ސްކޮލާޝިޕަށް ހޮވޭ ދަރިވަރުންނަށް ކޯސްފީ އާއި ސްޓީޕެންޑާއި ވިސާ ފީ އާއި ދެކޮޅު ޓިކެޓާއި ބުކް އެލަވެންސް އަދި އެސްޓަބްލިޝްމަންޓް އެލަވެންސް ލިބޭނެ ކަމަށެވެ.

ކޯސް ނިންމުމަށްފަހު ސްޓެލްކޯ ސްކޮލަޝިޕް އެގްރީމެންޓުގައި ބަޔާންކޮށްފައިވާ ބޮންޑް ޕީރިއަޑަށް އަމަލުކުރަންވާނެ ކަމަށް ވެސް އެ ކުންފުނިން ބުނެ އެވެ. އަދި ފޯމު ހުށަހަޅާ ފަރާތުގެ އަމިއްލަ އިއުތިރާޒުގެ ސަބަބުން ހުށަހަޅާ އިންޓޭކްގައި ބައިވެރިނުވެވިއްޖެ ނަމަ، އެ އޮފާ އާއި އެއްބަސްވުން އުވާލުމުގެ އިހްތިޔާރު ސްޓެލްކޯއަށް ލިބިގެންވާ ކަމަށް ވެސް އެ ކުންފުނިން ބުނެ އެވެ.

ސްޓެލްކޯއިން ބުނީ މި ކޯސްތަކާއި ގުޅޭ އިތުރު މައުލޫމާތު އެކުންފުނީގެ ވެބްސައިޓް އަދި ފޯނު ނަންބަރު 3338236 އަދި 3338480 އަށް ގުޅައިގެން ލިބޭނެ ކަމަށެވެ. އިތުރު މައުލޫމާތު ސާފުކުރަން އަށް މެއިލްކުރެވޭނެ ކަމަށްވެސް ސްޓެލްކޯއިން ވަނީ ބުނެފައެވެ.