މާލެ ސިޓީ ކައުންސިލުގެ ފަރާތުން ޓިކްޓޮކް މުބާރާތެއް!

ގްލޯބަލް ރިސައިކަލިން ޑޭއާ ގުޅިގެން، މާލެ ސިޓީ ކައުންސިލުން "ގެޓް ކްރިއޭޓިވް ގޯ ގްރީން އެންޑް ވިން ބިގް" ނަމުގައި ޓިކްޓޮކް ޕްލެޓް ފޯމަށް ޚާއްޞަކޮށްގެން މުބާރާތެއް ހުޅުވައިލައިފިއެވެ.

މިއަދުން ފެށިގެން، މި މަހުގެ 25 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ބައިވެރި ވުމުގެ ފުރުސަތުވަނީ އާންމުކޮށް، ހުރިހާ ޢުމުރު ފުރާތަކަށް ހުޅުވާލައިފައެވެ.

މުބާރާތުގައި ވާދަކުރުމަށް، ކޮންމެ ބައިވެރިއަކު ވެސް، ޢާއްމު ދިރިއުޅުމުގައި ދެވަނަ ފަހަރަށް ބޭނުން ކުރެވޭ ފަދަ އެއްޗެއް، ރިސައިކަލް ކުރެއްވުމަށް ފަހު، #RecycleWithMaleCity ޖެއްސެވުމަށް ފަހު، އެ ބޭފުޅެއްގެ އަމިއްލަ ފުޅު ޓިކްޓޮކް އެކައުންޓަށް އަޕްލޯޑް ކުރެއްވުމުން މުބާރާތުގައި ވާދަކުރެވޭނެއެވެ.

މުބާރާތުގައި ވަނަ ހޮވުމަށް ހަމަޖެހިފައިވަނީ، އެންމެ ގިނަ ޝެއާރ ލިބިވަޑައިގެންފައިވާ ފަރާތެއް ބެލުމަށް ފަހުއެވެ.

މި މުބާރާތުގެ އެއް ވަނައަށް ދާ ފަރާތަށް، 6000 ރުފިޔާގެ ފައިސާގެ އިނާމެއް ހުށަހެޅިފައިވާއިރު، ދެ ވަނައަށް އަންނަ ފަރާތަށް، ދިނުމަށް ހަމަޖެހިފައި ވަނީ 4000 ރުފިޔާއެވެ. އަދި ތިން ވަނައަށް އަންނަ ފަރާތަކަށް 2000 ރުފިޔާގެ ފައިސާގެ އިނާމެއް ދިނުމަށް ވެސް ވަނީ ހަމަޖެހިފައެވެ.

ބައިނަލް އަގުވާމީ ގޮތުން ފާހަގަކުރާ، ރިސައިކަލިން ޑޭއަކީ، އެއްގޮތަށް ވުރެ ގިނަ ގޮތްގޮތުން މުހިއްމު ދުވަހެކެވެ. މިއަދު ދުނިޔެ ތަރައްޤީވެ، ދިރިއުޅުމަށް ބޭނުންކުރާ ތަކެތި ގިނަވުމުން، އުކައިލަންޖެހޭ ތަކެތި ވެސް ދަނީ އިތުރުވަމުންނެވެ. ކުނި ނައްތައިލުމަކީ، މިއަދު މުޅި ދުނިޔެއަށް ކުރިމަތިވެފައިވާ، ގޮންޖެހުން ބޮޑު، ގިނަ ޚަރަދު ކުރަންޖެހޭ މަސަކަތަކަށް ވެފައިވާއިރު، ކުނީގެ ގޮތުގައި އުކައިލަންޖެހޭ، ވަރަށް ގިނަ ބާވަތުގެ ތަކެއްޗަކީ، ރީސައިކަލް ކޮށްގެން، ދެވަނަ ފަހަރަށް ބޭނުން ކުރެވިދާނެ ތަކެއްޗެވެ.

ބައިނަލް އަގުވާމީ ގޮތުން ފާހަގަކުރާ ރިސައިކްލިން ޑޭއަކީ، ކޮންމެ އަހަރެއްގެ ވެސް މާޗު މަހުގެ 18 ވަނަ ދުވަހުއެވެ.