މަމްސް އެއިޑުގެ "ބެކް ޓު ސްކޫލް" ކެމްޕޭނަށް  ބީއެމްއެލް އިސްލާމިކުން އެއް ލައްކަ ރުފިޔާ!

މަމްސް އެއިޑްއިން ކޮންމެ އަހަރަކުވެސް ކުރިޔަށް ގެންދާ ބެކް ޓު ސްކޫލް"‌‌ ކެމްޕޭނަށް ބީއެމްއެލް އިސްލާމިކް އިން އެހީފޯރުކޮށްދީފި އެވެ.

ބީއެމްއެލްއިން މިއަދު ބުނީ މަމްސް އެއިޑްގެ ކެއާ ލިސްޓުގައި ހިމެނޭ އާއިލާތަކުގެ ތެރެއިން ދިރާސީ އާ އަހަރު ފެށޭއިރު ސްކޫލަށް ތައްޔާރު ކުރުމުގައި ދަތިތަކާ ކުރިމަތިލާން ޖެހިފައިވާ އާއިލާތަކުގެ ކުދިންނަށް ބޭނުންވާ ތަކެތި ފޯރުކޮށްދިނުމަށް މަމްސް އެއިޑުން ހިންގާ "ބެކް ޓު ސްކޫލް" ކެމްޕޭނަށް ބީއެމްއެލް އިސްލާމިކް އިން 100،000 ރުފިޔާ ހަދިޔާކޮށްފައިވާ ކަމަށެވެ.

އެގޮތުން މި އެހީގެ ދަށުން 100 ދަރިވަރަކަށް އެހީތެރިކަން ފޯރުކޮށްދެވިގެންދާނެ ކަމަށް އެބޭންކުން ބުނެއެވެ,

އިޖުތިމާއީ އެކި ކަންކަމަށް އެހީތެރިކަން ފޯރުކޮށްދިނުމަށް ބޭންކް އޮފް މޯލްޑިވްސް އިން އަބަދުވެސް އިސްކަން ދެއެވެ. އެގޮތުން ވޭތުވެ ދިޔަ އަހަރުތަކުގެ ތެރޭގައި މަމްސް އެއިޑުން ހިންގި އެކި ހަރަކާތްތަކަށްވެސް އެހީތެރިކަން ފޯރުކޮށްދީފައިވާއިރު، މި ރަމަޟާން މަހު އަސާސީ ބޭނުންތައް ފުއްދުމަށް ދަތިވެފައިވާ އާއިލާތަލަށް އެހީތެރިކަން ފޯރުކޮށްދިނުމަށް މަމްސް އެއިޑުން ހިންގި ކެމްޕޭނަށް ބޭންކުގެ މުވައްޒަފުންވަނީ އަމިއްލަ ގޮތުން އެހީތެރިވެދީފައެވެ.

ބީއެމްއެލް އިސްލާމިކް އިން އަންނަނީ ޚިދުމަތަށް 10 އަހަރު ފުރޭ މުނާސަބަތާ ގުޅިގެން މުޖުތަމައަށް އެހީތެރިކަން ފޯރުކޮށްދިނުމަށް މިފަދަ ތަފާތު ހަރަކާތްތައް ހިންގަމުންނެވެ.