ފިހާރަތަކަށް ޒިޔާރަތްކޮށް މައުލޫމާތުދިނުމުގެ ހަރަކާތެއް އުނގޫފާރުގައި ފުލުހުން ކުރިއަށް ގެންގޮސްފި

ރ. އުނގޫފާރަކީ ކުށްމަދު އަމާން މުޖުތަމައަކަށް ހެދުމަށް ކުރަމުންދާ މަސައްކަތުގެ ތެރެއިން އެ ރަށު ފިހާރަތަކަށް ޒިޔާރަތްކޮށް މައުލޫމާތުދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.

މި ފެބުރުވަރީ މަހުގެ 15 ވަނަ ދުވަހު އުނގޫފާރު ޕޮލިސް ސްޓޭޝަނުން ކުރިއަށް ގެންދިޔަ މި ޕްރޮގްރާމުގައި ރަށުގެ ހުރިހާ ފިހާރައަކަށް ޒިޔާރަތްކޮށް މައުލޫމާތުދީފައިވެއެވެ.

އެގޮތުން، ސްކޭމްގެ މައްސަލަތަކުން ސަލާމަތްވުމަށާއި ފިހާރަތަކުގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވިދާނެ ކަންކަމުގެ މައުލޫމާތުދީފައިވެއެވެ. އަދި ވައްކަމުގެ މައްސަލަތަކުން ސަލާމަތްވުމަށާއި ސްކޭމް ނުވަތަ ވައްކަމުގެ އެއްވެސް މައްސަލައެއް ދިމާވެއްޖެނަމަ އަމަލުކުރާނެގޮތުގެ މައުލޫމާތުދީފައިވެއެވެ.

މަކަރާއި ހީލަތުގެ މައްސަލަތަކުން ވިޔަފާރިވެރިން ރައްކާތެރިކުރުވުމަށް ފިހާރަތަކަށް ޒިޔާރަތްކޮށް މައުލޫމާތުދިނުމުގެ ސިލްސިލާ ޕްރޮގްރާމްތައް ފުލުހުން ދަނީ ހިންގަމުންނެވެ.