ތިނަދޫ ސިޓީގައި ޤާއިމުކުރާ 200 ހައުސިން ޔުނިޓަށް ކުރިމަތިލުމުގެ ފުރުޞަތު ހުޅުވާލައިފި

ތިނަދޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް އެސިޓީގެ އަލަށް ހިއްކާފައިވާ ބިމުގައި ތަރައްޤީކުރަމުންދާ ހައުސިންގ ޔުނިޓުތަކަށް ކުރިމަތިލުމުގެ ފުރުސަތު ހުޅުވާލާފައި އެވެ.

ތިނަދޫ ސިޓީ ކައުންސިލުން މިއަދު ގެޒެޓުކުރި އިއުލާނެއްގައި ބުނީ ތިނަދޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ތިނަދޫ ސިޓީ ކައުންސިލާއި ސަރުކާރުން އެކަށައަޅާފައިވާ ސިޔާސަތުގެ ދަށުން ، ތިނަދޫ ސިޓީގެ ރައްޔިތުންނަށާއި، ތިނަދޫ ސިޓީއަށް ހިޖުރަކުރަން ބޭނުންވާ އެހެނިހެން ދިވެހި ރައްޔިތުންނަށް ޚާއްސަކޮށްގެން ތިނަދޫ ސިޓީގައި ސަރުކާރުން ޢިމާރާތްކުރަމުންދާ 200 ހައުސިންގ ޔުނިޓަށް އެދި ޕޯޓަލް މެދުވެރިކޮށް ހުށަހެޅުމުގެ ފުރުސަތު މިއަދު 13:00 ގައި ހުޅުވާލާފައިވާ ކަމަށެވެ.

އެގޮތުން ހައުސިންގ ޔުނިޓަށް އެދި ޕޯޓަލް މެދުވެރިކޮށް ހުށަހެޅުމުގެ ފުރުޞަތު 29 ޖެނުއަރީ 2025 ވަނަ ދުވަހުގެ 13:00ން ފެށިގެން 30 އޭޕްރިލް 2025 ވާ (ބުދަ) ދުވަހުގެ 14:00ގެ ނިޔަލަށް ވަނީ ހުޅުވާލާފައި އެވެ.

ފޯމު ހުށަހެޅުމަށް ހަމަޖެހިފައިވަނީ 03 ކެޓަގަރީއަކަށް ބަހާލައިގެން ކެޓަގަރީ A (ތިނަދޫ ރައްޔިތުންނަށް ޚާއްސަ ކުރެވޭ ކެޓެގަރީ)، ކެޓަގަރީ B (ތިނަދޫ ދަފްތަރު އަދި ތިނަދޫ ސިޓީއަށް ރަށްވެހިކަން ބަދަލުކޮށްފައިވާ ފަރާތްތަކުގެ ކެޓެގަރީ) ، ކެޓަގަރީ C (ތިނަދޫގެ އާބާދީ އިތުރުކުރުމުގެ ސިޔާސަތުގެ ދަށުން ތިނަދޫ ސިޓީއަށް ހިޖުރަކުރަން ބޭނުންވާ ފަރާތްތަކަށް ޚާއްސަ ކެޓެގަރީ ) ތިނަދޫ ސިޓީ ކައުންސިލްގެ ހައުސިންގ ޕޯޓަލް " www.housing.thinadhoo.gov.mv " މެދުވެރިކޮށެވެ.

މި 200 ހައުސިންގ ޔުނިޓް ދޫކުރުމަށް ހަމަޖެހިފައިވާ އުޞޫލު ދިވެހި ސަރުކާރުގެ ގެޒެޓުންނާއި ތިނަދޫ ސިޓީ ކައުންސިލްގެ ހައުސިންގ ޕޯޓަލްއިން ފެންނަންހުންނާނެއެވެ.

މީގެ އިތުރުން، ފޯމާ ގުޅޭގޮތުން ހުށަހެޅޭ ޝަކުވާތައް ބަލައިގަތުމާއި، އެ ޝަކުވާތަކަށް ދެވޭ ޖަވާބުތަކާއި، އަދި ކަމާ ގުޅޭ ފަރާތްތަކަށް ލިބިފައިވާ ޕޮއިންޓްތަކުގެ ތަފްޞީލު ފެންނަން ހުންނާނީ އޮންލައިން ޕޯޓަލް މެދުވެރިކޮށެވެ.