ކަނޑު އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް މައުލޫމާތުދިނުމުގެ ޕްރޮގްރާމެއް ގެމަނަފުށީގައި!

ކަނޑު އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް މައުލޫމާތުދިނުމުގެ ޕްރޮގްރާމެއް ގެމަނަފުށީގައި ކުރިއަށް ގެންގޮސްފިއެވެ.

ގެމަނަފުށި ޕޮލިސް ސްޓޭޝަނުން ކުރިއަށް ގެންދިޔަ މި ޕްރޮގްރާމުގައި، އޮޑި ދޯނި ފަހަރު، ލޯންޗު އަދި ޑިންގީ ދުއްވާ މީހުންނާ ބައްދަލުކޮށް މޫސުމާ ގުޅިގެން ސަމާލުކަން ދޭންވީ ކަންކަމާއި ރައްކާތެރިކަމުގެ ގޮތުން އެޅިދާނެ ފިޔަވަޅުތަކާ ގުޅޭގޮތުން މައުލޫމާތުދީފައިވެއެވެ.

އެގޮތުން، އުޅަނދުގައި އެކަނި ކަނޑު ދަތުރުނުކުރުމަށާއި، ލައިފް ޖެކެޓް ހަމަޔަށް ހުރިތޯ ބެލުމާއި، މުވާސަލާތީ ވަސީލަތް ރަނގަޅުތޯ ބެލުމާއި، ރޭގަނޑު ނެވިގޭޝަން ދިއްލުނުކަން ޔަގީން ކުރުމާއި، ޑިންގީތަކުގައި ސަމުގާ ހަރުކުރުމަށްް އިލްތިމާސްކޮށްފައިވެއެވެ. އަދި އުޅަނދު ފައްތިޔަލުގައި ބާއްވާއިރު ރަނގަޅަށް އެޅުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައިވެއެވެ. އަދި އެހީތެރިކަމަށް ބޭނުންވާހިނދު އަމަލުކުރަންވީގޮތުގެ މައުލޫމާތު ވެސް ހިއްސާކޮށްފައިވެއެވެ.

މި ޖަނަވަރީ މަހުގެ 15 ވަނަ ދުވަހު ކުރިއަށް ގެންދިޔަ މި ޕްރޮގްރާމަކީ މޫސުން ގޯސްވެ ކަނޑުތައް ގަދަވާނެ ކަމަށް މޫސުމާބެހޭ ގައުމީ އިދާރާއިން ލަފާކޮށްފައިވާތީ ރައްކާތެރިކަމުގެ ފިޔަވަޅުއަޅައި ހޭލުންތެރިކުރުވުމަށް ކުރިއަށް ގެންދިޔަ ޕްރޮގްރާމެކެވެ.