ޕީއެންސީގެ އެސްޖީއަކަށް މުއާޒް ހަލީމް!

ވެރުކަން ކުރާ ޕީއެންސީގެ ސެކްރެޓްރީ ޖެނަރަލްގެ މަގާމަށް ޑިފެންސް މިނިސްޓްރީގެ ސްޓޭޓް މިނިސްޓަރު މުއާޒު ހަލީމް އައްޔަންކޮށްފި އެވެ.

ޕީއެންސީގެ އެސްޖީއަކަށް މުއާޒް އައްޔަނުކޮށްފައިމިވަނީ އެ މަގާމު ހުސްކޮށް އޮންނަތާ 13 ދުވަހަށް ފަހު ގައި އެވެ. އެމަގާމުގައި މީގެ ކުރިން ހުންނެވީ ޒީނާޒު އަދުނާނު އެވެ. ނަމަވެސް ޒީނަތުގެ ދައުރު ހަމަވީ މިދިޔަ މަހުގެ 31 ވަނަ ދުވަހު އެވެ.

މުއާޒް އެސްޖީ ކަމަށް އައްޔަނުކޮށްފައިވާކަން އެޕާޓީންވެސް މިއަދު ވަނީ ރަސްމީކޮށް އިއުލާނުކޮށްފައެވެ. ޕީއެންސީން ވަނީ މުއާޒު އަށް މަރުހަބާވެސް ދަންނަވާފައި އެވެ.

ޕީއެންސީއަށް އެސްޖީއަކު އައްޔަނުކޮށްފައިމިވަނީ އެޕާޓީއަށް މެންބަރުން އިތުރު ކުރަން ހުށަހެޅި ފޯމުތަކުގެ ތެރޭގައި އެހެން ޕާޓީތަކުގެ ގިނަ އަދަދެއްގެ މެމްބަރުން ވެސް ހިމެނޭހެން ފޯމުތަކެއް އިލެކްޝަން ކޮމިޝަނަށް ހުށަހަޅާފައިވާ ކަމުގެ މައްސަލަތަކެއް ފެންމަތިވެފައިވަނިކޮށެވެ. އެގޮތުން އެމްޑީޕީގެ ޑެޕިއުޓީ ޕީޖީ ލީޑަރު ހުސެއިން ޒިޔާދު (ފިއްޓޭ) ވެސް ވަގު ފޯމެއް މެދުވެރިކޮށް ޕީއެންސީއަށް ވެއްދި މައްސަލައެއް މިއަދު ވަނީ ފެންމަތިވެފައި އެވެ. އީސީން ނެރުނު ބަޔާނެއްގައި ބުނެފައިވަނީ އެފޯމު އީސީއަށް ހުށަހެޅީ ވެސް ޕީއެންސީގެ ފަރާތުން ކަމަށެވެ.

މި މައްސަލައާ ގުޅިގެން ޕީއެންސީން މިހާތަނަށް އެއްޗެއް ނުބުނެ އެވެ.