ހިޖުރަ ގްރޫޕުގެ ބެލުމުގެ ދަށުން އުމްރާއަށް ދިޔަ އުމްރާވެރިންތަކެއް ހާލުގައި ޖެހިއްޖެ: ސަރުކާރުން އެހީވަނީ

ހިޖުރަ ގްރޫޕުގެ ބެލުމުގެ ދަށުން އުމްރާއަށް ދިޔަ އުމްރާވެރިންތަކެއް ސައުދީ އަރަބިއާގައި ރާއްޖެ ނާދެވި ތާށިވުމާއި ގުޅިގެން އެފަރާތްތަކަށް އެހީވުމަށް މަސައްކަތްކުރަމުންދާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފި އެވެ.

އަލްހަޖްރު ނަމަކަށް ކިޔާ ކުންފުންޏެއްގެ ހަވާލުގައި ސައުދީއަށް ދިޔަ 24 ދިވެއްސަކު ރާއްޖެ ނާދެވި ތާށިވެފައިވަނީ ކުންފުނިން އެފަރާތްތަކުގެ ޓިކެޓު ހަމަޖައްސާފައިނުވާތީ އެވެ. އެކުންފުނިން މިއަދު ބުނީ އުމްރާވެރިންގެ އަޅުކަން ނިމިފައިވީ ނަމަވެސް، ކުންފުންޏަށް ދިމާވެފައިވާ މާލީ ދަތިތަކާ ހުރެ އުމްރާވެރިން ރާއްޖެ ގެންނަން ދަތިވެފައިވާ ކަމަށެވެ.

މިކަމާއި ގުޅިގެން އިސްލާމީ ކަންތައްތަކާއި ބެހޭ ވަޒީރު ޑރ މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ އަލްހިޖްރަ ކިޔާ ކުންފުންޏެއްގެ ޙަވާލުގައި އުމްރާއަށް ދިޔަ ބަޔަކަށް ދިމާވެފައިވާ ޙާލަތު މިނިސްޓްރީގެ ސަމާލުކަމަށް އައިސްފައިވާ ކަމަށާއި ރައްޔިތުން އެނބުރި ޤައުމަށް އައުމަށް ކޮށްދެވެން އޮތް ކަމެއް މިނިސްޓްރީން ކުރާނެ ކަމަށެވެ.

އެގޮތުން މައްކާގައި މިވަގުތުގައި އޮތް މޯލްޑިވްސް ޙައްޖު ކޯޕަރޭޝަންގެ ޓީމު މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މަސައްކަތްކުރަމުންދާ ކަމަށާއި އެމަކާއި ގުޅިގެން ހައްޖު ކޯޕަރޭޝަންގެ އެމްޑީއަށް އިރުޝާދު ދީފައިވާ ކަމަށްވެސް ޝަހީމް ވިދާޅުވިއެވެ.

ޝަހީމް އިތުރަށް ވިދާޅުވީ ދިވެހި އެއްވެސް ރައްޔިތަކަށް ދިމާވާ ދަތިކަމެއްގައި އެހީ ނުވެ ނުތިބޭނެ ކަމަށާއި ރައީސް ޑރ މުހައްމަދު މުއިއްޒު އަބަދުވެސް އިރުޝާދު ދެއްވަނީ ރައްއްޔިތުންނާ ގާތުން މަސައްކަތްކުރުމަށް ކަމަށެވެ.