ރައީސްގެ ހިޔާލު: ކައުންސިލްތަކުގެ މެމްބަރުން ޕާޓް-ޓައިމް ކުރުން!

ރައީސް އާއި ނައިބް ރައީސް ފިޔަވައި، ކައުންސިލްތަކުގެ މެންބަރުންގެ މަގާމަކީ ޕާޓް-ޓައިމް މަގާމުތަކަށް ހެދުމާއި މެދު ރައްޔިތުން ދެކެވަޑައިގަންނަވާ ގޮތް ބެއްލެވުމަށް ރައީސް ޑރ. މުހައްމަދު މުއިއްޒު، ހިޔާލަށް ހުޅުވާލައްވައިފިއެވެ.

ލޯކަލް ކައުންސިލްތަކުގެ ޚަަރަދު ކުޑަކުރެވޭނެ ގޮތްތަކެއް އާއްމުންގެ ޚިޔާލަށް ރައީސް ހުށަހެޅުއްވީ މިހާރު ހުވަދޫ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ. ފިޔޯރީ ރައްޔިތުންނާއި ބައްދަލުކުރައްވައި މިރޭ ދެއްކެވި ވާހަކަފުޅުގައި އެވެ.

އެގޮތުން ރައީސް ވިދާޅުވީ، ކައުންސިލްތަކުގެ ޚަރަދު ކުޑަކުރެއްވުމުގެ ގޮތުން އެމަނިކުފާނަށް ފެނިވަޑައިގަންނަވާ ބައެއް ކަންކަން މީގެކުރިން ރައްޔިތުންނާއި ހިއްސާކުރައްވާފައިވާކަމަށާއި އެގޮތުން ކައުންސިލަރުންގެ އަދަދު މަދުކުރުމަށް ހުށަހެޅުއްވިކަމަށެވެ. ނަމަވެސް އެކަމުގެ ސަބަބުން ރައްޔިތުންގެ ބައިވެރިވުން ކުޑަވުމުގެ ކަންބޮޑުވުން ބައެއް ފަރާތްތަކުން ފާޅުކުރެއްވި ކަމަށާއި އެކަންބޮޑުވުންތަކަށް ހައްލު ލިބޭގޮތަށް ކައުންސިލްތަކުގެ ޚަރަދު ކުޑަކުރެވޭނެކަމަށެވެ.

އެގޮތުން ރައީސް ދެއްވި ހިޔާލުފުޅަކީ ކައުންސިލްތަކުގެ ރައީސާއި ނައިބު ރައިސްއަށް އެކަނި ފުލްޓައިމް ވަޒީފާ ގޮތުގައި މުސާރަ ލިބޭގޮތަށް ހަމަޖެއްސުމަށްފަހު، ދެން ތިއްބަވާ މެމްބަރުންނަށް ބައިވެރިވާ ކޮންމެ ބައްދަލުވުމަކަށް އެލަވަންސް ދޭ ގޮތަށް ހަމަޖެއްސުމެވެ. ކައުންސިލްތަކުގެ އިތުރުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ސިޓީ ކައުންސިލްތަކަށް މެމްބަރުން އައްޔަންކުރާއިރުވެސް ވީ ހަމަ މިއުސޫލުން ޢަމަލުކުރެވިދާނެކަމަށް ރައީސް ވިދާޅުވިއެވެ.

ރައީސް ވިދާޅުވީ އެގޮތަކީ ތަރައްގީވެފައި އޮންނަ ގައުމުތަކުގައި އޮންނަ ގޮތް ކަމަށާއި އެފަދަ ބަދަލެއް ގެނެސްފި ނަމަ ކައުންސިލްތަކަށް ކުރާ ހަރަދު ކުޑަކުރެވި ސަލާމާތްކުރެވޭ ފައިސާއިން ރައްޔިތުންނަށް އިތުރު ތަރައްޤީގެނެވޭނެ މަގު ފަހިވެގެންދާނެ ކަމަށެވެ.

ރައީސް އިތުރަށް ވިދާޅުވީ މިފަދަ ނިންމުންތަކަކީ ރައްޔިތުންގެ ބަސް ހޯދައިގެން ނިންމޭނެ ފަދަ ނިންމުންތަކެއް ކަމަށާއި އެހެންކަމުން މިކަމުގައި ޢާއްމުންދެކޭ ގޮތް ހިއްސާކުރެއްވުމަށް އެދިވަޑައިގަންނަވާ ކަމަށެވެ.