އެގްރޯނެޓު އުވައެއް ނުލަން, ބަދަލުކުރީ މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯންގެ ދަށަށް - ރައީސް

ރާއްޖޭގައި ދަނޑުވެރިކަމުގެ ސިނާއަތް ކުރިއަރުވައި ދިވެހި ދަނޑުވެރިންގެ މަސައްކަތްތައް ވިއްކުމަށް އުފައްދާފައިވާ އެގްރޯނެޓް ކުންފުނި އުވާނުލާ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވެފައިމިވަނީ އެގްރޯނެޓު އުވާލާފައިވާކަމަށް މިދިޔަ މަހުގެ ތެރޭގައި ބައެއް ނޫސްތަކުން ރިޕޯޓުކޮށްފައިވާ ދަނޑިވަޅެއްގައި އެވެ. އެގޮތުން މިހާރު ހުވަދު އަތޮަޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގއ ނިލަންދޫއަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ އެގްރޯނެޓް އުވާލާފައިވާ ކަމަށް ބުނެ ވާހަކަތަކެއް ދައްކަމުންދަނީ ހަގީގަތަށް ނޫން ކަމަށެވެ.

އެގޮތުން މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯންގެ ނަމުގައި ސަރުކާރުގެ 100 އިންސައްތަ ހިއްސާވާ ކުންފުންޏެއް ވުދޫޖު ކޮށްފައިވާކަމަށާއި އެގްރޯނެޓު އެ ކުންފުނީގެ ދަށުން ހިންގާ ކުންފުންޏެއްގެ ގޮތުގައި ބަދަލުކޮށްފައިވާ ކަމަށެވެ.

އެހެންކަމުން އެގްރޯނެޓު ކުންފުނި އުވިގެން ގޮސްފައިނުވާކަން ފާހަގަކުރައްވައި ރައީސް ވިދާޅުވީ ކުރެވުނު މަސައްކަތްތަކަކީ އެ ކުންފުނީ ހިންގާ ގޮތް ހަރުދަނާ ކުރުމާއި އިތުރަށް ފުޅާކުރުމަށް ނިންމުން ކަމަށެވެ. އަދި އެގްރޯނެޓް ނުވަތަ އެ ނިޒާމުގެ ތެރެއިން ރާއްޖޭގައި ދަނޑުވެރިކަން ފުޅާކުރުމަކީ ސަރުކާރުގެ މުހިންމު ސިޔާސަތެއްކަމަށާއި ރާއްޖޭގެ އިގްތިސާދު ފުޅާކުރުމަށް ބަލާއިރު ދަނޑުވެރިކަމަކީ ސަރުކާރުން ވަރަށް ބޮޑަށް ސަމާލުކަން ދޭ ދާއިރާއެއްކަމަށާއި ސަރުކާރުގެ ވިސްނުމަކީ މިހާރަށްވުރެ ބޮޑަށް އެ މަސައްކަތްތައް ރަނގަޅުކުރުންކަމަށް ރައީސް ވިދާޅުވިއެވެ.

ރާއްޖޭގެ ރައްޔިތުންނަށް ބޭނުންވާ ވަރަށް ކާބޯތަކެތި އުފެއްދުމަށްޓަކައި ރާއްޖޭގެ އެކި ކަންކޮޅުތަކަށް ބަހާލައިގެން ސަރުކާރުންވަނީ މުހިންމު މަސައްކަތްތަކެއް ފަށާފައިކަމަށާއި އެފަދަ އިންވެސްޓުމެންތަކަށް ފުރުސަތު ހުޅުވާލައިގެން އެފަދަ މަސައްކަތްތައް ރާއްޖޭގައި ގާއިމުކުރުމަށް ވަރަށް ބާރު ދުވެއްޔެއްގައި މަސައްކަތްތައް ކުރެވެމުންދާކަމަށް ރައީސް ވިދާޅުވިއެވެ.