ރަށުން ބޭރުގައި ޑިއުޓީކުރަމުން ދިޔަ ބައްޕަ މަތިން ހަދާންވާތީ ރައީސަށް ދިއްކޮއްލީ ނޯޓުކޮޅެއް: މާލަސްތަކެއް ނުވެ އާޔަލްގެ ބައްޕަ އާޔަލްގެ ކައިރިއަށް!

ރައީސް ޑރ މުހައްމަދު މުއިއްޒު މިހާރު ހުވަދު އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން މިއަދު ގއ ކަނޑުހުޅުދޫއަށް ވަޑައިގެން އެމަނިކުފާނަށް މަރުހަބާ ދެންނެވުމަށް ސަފުގައި ހުރި އުމުރުން ތިން އަހަރުގެ އާޔަލް ބިން އަލީ ސައީދު އާއި ސަލާންކުރަމުން އެކުއްޖާ ރައީސްއަށް ދިއްކޮއްލީ ކުޑަނޯޓުކޮޅެކެވެ. ނޯޓު ކޮޅުގައި ލިޔެފައި އޮތީ އޭނާގެ ބައްޕަ މަތިން ހަނދާންވާ ވާހަކައެވެ. ނުވަތަ "އައި މިސް މައި ޑެޑީ" އެވެ.

ނޯޓުކޮޅު ފެނިވަޑައިގަތުމާ އެކު ބައްޕަ ކޮބައިތޯ ރައީސް އެއްސެވުމުން އާޔަލްގެ ކައިރީގައި ހުރި އޭނާގެ މަންމަ އައިޝަތު ހުޒާމާ ބުނީ އޭނާގެ ފިރިމީހާ މަސައްކަތް ކުރަނީ އެހެން ރަށެއްގައި ކަމަށެވެ. މިއާއި އެކު ރައީސް އެމަނިކުފާނުގެ ސެކެޓްރީގެ އަރިހުގައި ދެންނެވީ ތުއްތު އާޔަލްއަށް އޭނާގެ ބައްޕައާއި ބައްދަލުކުރެވޭނެ އިންތިޒާމު ހަމަޖައްސަވައި ދެެއްވުމަށެވެ.

އާޔަލްގެ ބައްޕަ ސާޖަންޓު އަލީ ސައީދު އެވަގުތު ޑިއުޓީ ކުރަމުންދިޔައީ ގއ އަތޮޅާ ޖެހިގެން އޮންނަ ގދ. ފަރެސްމާތޮޑާ ޕޮލިސް ސްޓޭޝަންގައި އެވެ. ރައީސްގެ އެދިލެއްވުމަށް ފުލުހުން ވަނީ ސާޖަންޓު އަލީ ސައީދު އެވަގުތު އެރަށަށް ފޮނުވާފައި އެވެ. 45 ވަރަަކަށް މިނިޓުގެ ދިގު ދަތުރަކަށްފަހު ސާޖަންޓު އަލީ ސައީދު ކަނޑުހުޅުދޫއަށް އައި އިރު އާޔަލް ހުރީ އޭނާގެ މަންމައާއިއެކު ބަނދަރުމަތީގައި އެވެ.

ބައްޕައަށް ރަށަށް ފޭބުމާއި އެކު އާޔަލް ގޮސް ބައްޕަގެ ގައިގައި ބައްދައިގަތުމާއި އެކު ސާޖަންޓު އަލީ ސައީދުއަށްވެސް އޭނާގެ ކަރުނަ ހިފަހައްޓައި ނުލެވުނެވެ.

ރައީސް ކަނޑުހުޅުދާއަށް ކުރި ޒިޔާރާތުގެ ރަސްމީކަންކަން ނިންމާލެއްވުމަށްފަހު ފުރާވަޑައިގަތުމަށް ބަނދަރަށް ވަޑައިގަތުމުން އާޔަލްއާއި އޭނާގެ ބައްޕަ ވަނީ ރައީސްގެ އަރިހަށް ވަޑައިގެން އެމަނިކުފާނަށް ޝުކުރު އަދާކޮށްފައެވެ. އެއާއި އެކު ރައީސް އާޔަލްގެ ކައިރިން އެއްސެވީ " މިހާރު ހެޕީ ތޯ " އެވެ.

މިކަމާއި ގުޅިގެން ފުލުހުންގެ ތަރުޖަމާނު ވިދާޅުވީ މިކަން ހިނގާފައިވާ ގޮތަކީ، ތުއްތު ކުއްޖާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަތްޕުޅަށް ދިން ގަނޑުކޮޅެއްގައި އެކުއްޖާ ބައްޕަ މަތިން ހަނދާން ވާކަމަށް ލިޔެފައިވުމާއި، އެ ކުއްޖާ އަށް 1 އަހަރުން ފެށިގެން ބައްޕަ އުޅެނީ ރަށުން ބޭރުގައި ކަމަށް ވުމުން، ރައީސް ބޭނުންފުޅުވީ ރައީސް އެ ރަށުން ފުރާވަޑައިގަތުމުގެ ކުރިން ވާންއޮތްކަމެއްނަމަ ބައްޕަ އާއި ކުއްޖާއާ އެކު ބައްދަލުވާނެ ފުރުސަތު އޮތްތޯ ބެއްލެވުމަށްކަމަށެވެ. އެގޮތުން ތުއްތު ކުއްޖާގެ ބައްޕަ ހުރީ ކައިރި ރަށެއްގެ ޕޮލިސް ސްޓޭޝަނެއްގައިކަމުން އެވަގުތަށް އެކަން އެ މުއައްސަސާއިން ހަމަޖައްސައިދިނީ ކަމަށް ޝިފާން ވިދާޅުވިއެވެ.

އަދި މިކަމުގައި، މި ޚިދުމަތުގެ މުވައްޒަފުންނާމެދު ޢަމަލުކުރަމުންދާ އުސޫލުތަކާއި ތަފާތު ގޮތަކަށް ޢަމަލުކޮށްފައިނުވާނެ ކަމަށްވެސް ޝިފާން ވިދާޅުވިއެވެ.