ރޯދައަށް ހުރިހާ ރަށެއްގެ ކަރަންޓު މައްސަލަ ހައްލުކޮށްދޭނަށް - ރައީސް

ކުރިއަށް އޮތް ރޯދަ މަހަށް ހުރިހާ ރަށެއްގެ ކަރަންޓުގެ މައްސަލަ ހައްލުކުރުމަށް މަސައްކަތްތަކެއް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މިހާރު ހުވަދު އަތޮޅަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ގދ ފިޔޯރީއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި މިރޭ ދެއްކެވި ވާހަކަފުޅުގައި އެވެ.

ރައީސް ވިދާޅުވީ ގިނަ ރަށްރަށުގައި ފެނަކާއިން ކަރަންޓު ފޯރުކޮށްދިނުމަށްޓަކައި ބޭނުންކުރާ ގިނަ ޖަނެރޭޓަރުތައް ހުރީ ބަދަލުކުރަން ޖެހިފައި ކަމަށާއި، ސަރުކާރާ ހަވާލުވި އިރު "އެތައް އަހަރެއް ވެފަ އޮތީ އެތަންތަން ރަނގަޅަށް ނުބަލަހައްޓާތާ" ކަމަށެވެ. އަދި މިދިޔަ އަހަރުވެސް ގިނަ އަދަދެއްގެ ފައިސާ ކަރަންޓުގެ މައްސަލަ ހައްލުކުރުމަށްޓަކައި ހޭދަ ކުރަން ޖެހުނު ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ މި މައްސަލައަށް ހައްލު ގެންނެވުމަށްޓަކައި ފިނޭންސް މިނިސްޓްރީއާއި ފެނަކައާ އެސްޓީއޯ އެމްޓީސީސީ ފަދަ ކުންފުނިތައް ގުޅިގެން ޚާއްސަ މަސައްކަތްތަކެއް ފަށާފައިވާ ކަމަށެވެ. އަދި ސަރުކާރުގެ އަމާޒަކީ ކުރިއަށް އޮތް ރޯދަމަސް އަންނަން ވާއިރަށް މުޅި ރާއްޖޭގަ ކަރަންޓުގެ މައްސަލަ ހުރި އެއްވެސް ރަށެއް ދޫކޮށްނުލާ ހުރިހާ ރަށެއްގަ ޖަނެރޭޓަރުތަކުގެ މައްސަލަ ހައްލުކުރުމަށް ގެންނަން ޖެހޭ ޖަނެރޭޓަރުތައް ގެނެސްދީ އިންސްޓޯލްކޮށް ނިންމަން ކަމަށެވެ.

އެމަނިކުފާނު ވިދާޅުވީ އެކަމަކީ ވަރަށް ބޮޑެތި ގޮންޖެހުންތަކެއް ހުރި މަސައްކަތެއް ނަމަވެސް މިހާރު އެމަސައްކަތް ފަށާފައިވާ ކަމަށެވެ.

ރައީސް މުއިއްޒު ވެރިކަމާއި ހަވާލުވެވަޑައިގެން ފާއިތުވި 14 މަސްދުވަހުގެ ތެރޭގައި ފެނަކަ މެދުވެރިކޮަށް ރާއްޖޭގެ ގިނަ ރަށްތަކެއްގައި މި މައްސަލަ ހައްލުކުރުމަށް ގިނަ މަސައްކަތްތަކެއް ވަނީ ކޮށްފައި އެވެ. އެގޮތުން ކަރަންޓުގެ މައްސަލަ ދިމާވާ ރަށްތަކަށާއި ކަރަންޓު ވިއުގަ އަޕްގްރޭޑްކުރަން ޖެހޭ ރަށްތަކަށް ފާއިތުވި މަސްތަކުގެ ތެރޭގައި ގިނަ ޖަނަރޭޓަރުތަކެއް ގެންގޮސް އިންސްޓޯލްކޮށް މިހާރު ވަނީ އޮޕަރޭޝަނަށް ގެނެސްފައި އެވެ.