ޑަބްލިއުޑީސީގެ މެމްބަރުންނަށް ލިބޭ އެލަވަންސަށް މުސާރައިގެ ސްޓޭޓަސްދޭ އިސްލާހުތައް އަންނަ މަހު މަޖިލީހަށް ހުށަހަޅަނީ

އަންހެނުން ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ދިމާވެފައިވާ ދަތިތައް ފިލުވައިދިނުމަށް ގާނޫނުތަކަށް ގެނެވޭ އިސްލާހުތައް ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުހުޅުވޭ ހަފްތާގައި ސަރުކާރުން މަޖިލީހަށް ހުށަހަޅުއްވާނެ ކަން ރައީސް ޑރ މުހައްމަދު މުއިއްޒު ހާމަކުރައްވައިފި އެވެ.

ރައީސް މިކަން ހާމަކުރެއްވީ މިހާރު ހުވަދު އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ގދ ވާދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ އަންހެނުން ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ދިމާވެފައިވާ ދަތިތައް ފިލުވައިދިނުމަކީ އެމަނިކުފާނުގެ ރިޔާސީ ވައުދުފުޅެއް ކަމަށާއި އެގޮތުން އަންނަ މަހު މަޖިލީހުގެ މިއަހަރުގެ ފުރަތަމަ ދައުރު ހުޅުވޭ ތަނުން ފުރަތަމަ ހަފްތާގެ ތެރޭގައި އެވައުދު ފުއްދުމަށްޓަކައި ހުށަހަޅަންޖެހޭ އިސްލާހު މަޖިލީހަށް ހުށަހަޅާނެ ކަމަށެވެ. އެގޮތުން އެއީ ވަޒީފާއާއި ބެހޭ ގާނޫނާއި ލާމަރުކަޒީ ގާނުނަށް ގެންނަން ޖެހޭ ދެ އިސްލާހެއް ކަމަށެވެ.

އެ ދެ އިސްލާހާއި އެކު މިހާރު އަންހެނުން ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ލިބޭ އެލަވަންސަށް މުސާރައިގެ ސްޓޭޓަސް ދެވޭނެ ކަމަށް ރައީސް ވިދާޅުވިއެވެ. އަންހެނުން ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ދޭ އެލަވެންސް, އެލަވެންސެއް ގޮތުގައި އޮވެގެން މިހާތަނަށް ރޯދަ އެލަވަންސާއި އެހެނިހެން ބައެއް ފެސިލިޓީސް އެމެމްބަރުންނަށް ނުދެވޭކަމަށް ރައީސް ފާހަގަކުރެއްވި އެވެ.

ނަމަވެސް ގާނޫނަށް ގެންނަން ޖެހޭ އިސްލާހުތައް ގެނެސް ކުރިޔަށް އޮތް ރަމަޟާން މަހުން ފެށިގެން އެމެމްބަރުންނަށް ރޯދަ އެލަވެންސް ދެވޭނެކަން ރައީސް ތަކުރާރުކުރެއްވި އެވެ.