ބަޖެޓުން ވާދޫއަށް އެންމެ ބޮޑު އިސްކަމެއްދޭނީ މަގުތައް ހެދުމަށް - ރައީސް

މިއަހަރުގެ ބަޖެޓުގެ ތެރެއިން ގދ ވާދޫގައި ހިންގާ މަޝްރޫއުތަކުގެ ތެރެއިން އެންމެ ބޮޑު އިސްކަމެއް ދެއްވާނީ އެރަށުގެ މަގު ހެދުމުގެ މަޝްރޫއުއަށްކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މިހާރު ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އެރަށަށް ވަޑައިގެން ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި އެވެ.

އެގޮތުން ރައީސް ވިދާޅުވީ މިއަދު އެރަށަށް ވަޑައިގަތުމުންވެސް އެރަށުގެ މަގުތައް ހުރި ހާލު ފެނިވަޑައިގެންނެވި ކަމަށާއި އެރަށުގެ ހުރި މަގުތައް ހެދުމަކީ އެމަނިކުފާނު ޚާއްސަ އިސްކަމެއް ދެއްވާނެ ކަމެއް ކަމަށެވެ. އެގޮތުން ރަށުގެ މުހިންމު މުވައްސާސާތަކާއި އެހެނިހެން މުހިންމު ހިދުމަތްތައްދޭ މައި މަގުތައް ތަރައްޤީކުރުމަށް މިމަހު ތަންފީޒުކުރަން ފެށި 2025 ވަނަ އަހަރުގެ ބަޖެޓުން ޚާއްސަ އިސްކަމެއްދީ އެމަސައްކަތް ފައްޓަވާނެ ކަން ރައީސް އިއުލާނުކުރެއްވި އެވެ.

މީގެ އިތުރުން ވާދޫއަކީ ތައުލީމީ ރަށެއްކަން ފާހަގަކުރައްވައި ރައީސް ވިދާޅުވީ އެރަށުގެ ސްކޫލަށް ދިމާވެފައިވާ ޖާގައިގެ ދަތިކަމަށް މިއަހަރުގެ ތެރޭގައި ހައްލު ގެންނެވުމަށް މަސައްކަތްކުރައްވާނެ ކަމަށެވެ. އޭގެތެރޭގައި އަލަށް އިތުރުކުރެވޭ ކްލާސްރޫމްތަކާއި މަލްޓިޕާޕަސް ހޯލެއް ތަރައްޤީކުރުމުގެ މަސައްކަތް ރައީސް ފާހަގަކުރެއްވި އެވެ.

ރައީސް މިހާރު ހުވަދު އަތޮަލަށް ކުރައްވަމުންގެންދަވާ ދަތުރުފުޅުގައި ވާދޫ އަކީ އެމަނިކުފާނު މިއަދު ވަޑައިގެންނެވި ތިން ވަނަ ރަށެވެ. މިއަދު ހެނދުނު ރައީސް ފެއްޓެވި ދަތުރުފުޅުގައި އެންމެ ފުރަތަމަ ވަޑައިގެންނެވީ ގދ ހޯނޑެއްދޫއަށެވެ. އަދި އެއަށްފަހު ގދ ނަޑެއްލާއަށެވެ. މިއީ މި ރަށްތަކަށް ވެރިކަމާއި ހަވާލުވެވަޑައިގެންނެވި ފަހުން ރައީސް ރަސްމީ ދަތުރުފުޅެއް ކުރައްވާ ފުރަތަމަ ފަހަރެވެ.