މިއަހަރުގެ ބަޖެޓަކީ ވައުދު ފުއްދުމުގެ ބަޖެޓު, ނަތީޖާ އަމަލީ ގޮތުން ފެންނާނެ - ރައީސް

މިއަހަރު ވެގެންދާނީ ރިޔާސީ ކެމްޕެއިންގައި ވެވަޑައިގެންނެވި ވައުދުތަކުގެ އަމަލީ މަސައްކަތްތައް ފެށިގެންދާނެ އަހަރަށް ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މިހާރު ހުވަދު އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ގދ ހޯނޑެއްދޫއަށް ވަދައިގެން އެރަށު ރައްޔިތުންނާއި މުހާތަބްކުރައްވައި ދެއްކެވި ވާހަކަފުޅުގައި އެވެ.

އެގޮތުން ރައީސް ވިދާޅުވީ އެމަނިކުފާ ވެވަޑައިގެންނެވި ހުރިހާ ވައުދަކީ ފުއްދުމަށްޓަކައި ވެވަޑައިގެންނެވި ވައުދުތަކެއް ކަމަށާއި އެވައުދުތަކަށް ސަމާލުކަން ދެއްވާ ކަމަށެވެ. " ސަރުކާރުން އެންމެ އިސްކަން ދޭނީ ވައުދުތައް ފުއްދަން " ރައީސް ވިދާޅުވިއެވެ.

މިއަހަރުގެ ބަޖެޓު ހަދާފައިވަނީ މަޖިލީހުގެ މެމްބަރުންގެ ފުރިހަމަ އެއްބާރުލުވުމާއި އެކު އެބޭނުމުގައިކަން ފާހަގަކުރައްވައި ރައީސް ވިދާޅުވީ އެއީ ވައުދުފުއްދުމުގެ ބަޖެޓެއް ކަމަށެވެ. އަދި އެއީ ނަތީޖާ އަމަލީގޮތުން ނެރެދިނުމުގެ ބަޖެޓެއް ކަމަށެވެ.

އެހެންކަމުން މިއަހަރު ވެގެންދާނީ ތަރުތީބު ކުރެވިގެން އެކި ދާއިރާތަކުން އެކި ރަށްރަށުގައި ކެމްޕެއިންގައި ވެވަޑައިގެންނެވި ވައުދުތައް ފުއްދުމަށްޓަކައި އާއި މެނިފެސްޓޯގައި ފާޙަގަކޮށްފައިވާ ވައުދުތައް ފުއްދުމަށްޓަކައި މަސައްކަތްކުރެވޭނެ އަހަރެއް ކަމަށް ރައީށް ވިދާޅުވިއެވެ.

ރައީސް ވިދާޅުވީ އެމަނިކުފާނު ރަށްރަށަށް މިހާރު ކުރައްވާ ދަތުރުފުޅުތަކަކީ ރައްޔިތުންނާއި ގާތަށް އައިސް ރައްޔިތުން އެންމެ ބޭނުންވާ ހައްލު ގެނެސްދެއްވުމަށް ރައްޔިތުންގެ ރައްޔިތުންގެ ހިޔާލު ހޯދުމަށް ކުރާ ދަތުރުތަކެެއް ކަމަށާއި މިއަހަރު ރާއްޖޭގެ ހުރިހާ ކަންކޮޅަކުންވެސް ވައުދުތައް ފުއްދުމުގެ އަމަލީ މަސައްކަތް ރައްޔިތުންނަށް ފެނިގެންދާނެ ކަމަށެވެ.