ސްޕެއިނަށް ދަތުރުކުރަމުންދިޔަ ބޯޓެއް ބަންޑުން ޖަހާލައި ގިނަ ބަޔަކު މަރުވެއްޖެ

ހުޅަނގު އެފްރިކާއިން ސްޕެއިންގެ ކެނެރީ އައިލެންޑްސް އަށް ދަތުރުކުރަމުންދިޔަ ބޯޓެއް މޮރޮކޯ ކައިރިން ބަންޑުން ޖަހާލައި މާލިޔާގެ 25 މީހުންނާއެކު 69 މީހުން މަރުވެފައިވާ ކަމަށް މާލީގެ ކަމާބެހޭ ފަރާތްތަކުން ބުނެފިއެވެ.

ރިޕޯޓުތައް ބުނާގޮތުގައި މި ބޯޓު ބަންޑުން ޖަހާލީ މިމަހުގެ 19 ވަނަ ދުވަހު އެވެ. ނަމަވެސް ހާދިސާގެ ތަފްސީލް ކަމާބެހޭ ފަރާތްތަކުން އާންމު ކުރީ މިއަދު އެވެ.

މި ބޯޓު ބަންޑުން ޖަހާލި އިރު ބޯޓުގައި 80 މީހުން ތިބި އިރު ހާދިސާއިން ސަލާމާތްވީ އެންމެ 11 މީހުންނެވެ.

މިހާދިސާގައި މަރުވި މާލީއަށް ނިސްބަތްވާ މީހުންގެ ތެރެއިން ގިނަ މީހުންނަކީ އެ ގައުމުގެ ހުޅަނގުގައި އޮންނަ ކައިސް ސަރަހައްދަށް ނިސްބަތްވާ މީހުން ކަމަށް މިނިސްޓްރީ އޮފް މަލިއަންސް އެބްރޯޑްގެ އެޑްވައިޒަރު ޑޫލަޔޭ ކެއިޓާ ހުކުރު ދުވަހު އެސޯސިއޭޓެޑް ޕްރެސް އެޖެންސީއަށް ދެއްވި ބަޔާނެއްގައި ވިދާޅުވި އެވެ.

"މަރުވި 25 މާލިއަން މީހުންގެ ތެރެއިން އަޅުގަނޑުގެ ކޮމިއުނުން 8 މާލިއަން ހިމެނޭ،" ކަޔެސް ސަރަހައްދުގެ މަރޭނާގެ ކޮމިއުނުގެ މޭޔަރު މަމަޑޫ ސިބީ އޭޕީ އަށް ވިދާޅުވި އެވެ.

ހުޅަނގު އެފްރިކާގެ އައްސޭރިފަށުން ސްޕެއިންގެ ކެނެރީ އައިލެންޑްސް އަށް އެޓްލާންޓިކް މައިގްރޭޝަން ރޫޓުން، އާންމުގޮތެއްގައި އެފްރިކާގެ ހިޖުރަވެރިން ސްޕެއިންގެ މެއިންލޭންޑަށް ދިއުމަށް މަސައްކަތް ކުރާ އިރު، އަހަރުގެ މިހާތަނަށް އެރުޓޫން ސްޕެއިންއަށް 41،425 މީހުން އެތެރެވެފައިވާ ކަމަށް ތަފާސްހިސާބުތައް ދައްކައެވެ.