އަހަރުގެ މިހާތަނަށް ޒަކާތު ފަންޑަށް 98.6 މިލިއަން ރުފިޔާ: ރާއްޖޭގެ ތާރީހުގައިވެސް ރެކޯޑު އަދަދެއް!

މިހިނގާ 2024 ވަނަ އަހަރުގެ މިއަދާއި ހަމައަށް ޒަކާތު ފަންޑަށް 98 މިލިއަން ރުފިޔާ ލިބިއްޖެ އެވެ.

މިކަން ހާމަކުރައްވައި އިސްލާމީ ކަންތައްތަކާއި ބެހޭ ވަޒީރު ޑރ މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ މިއަދާ ހަމައަށް 2024 ވަނަ އަހަރު ޒަކާތު ފަންޑަށް .98.6 މިލިއަން ރުފިޔާ ލިބިފައިވާ ކަމަށާއި މިއީ ރާއްޖޭގެ ތާރީޚުގައި އެންމެ ގިނަ އަދަދަކަށް ޒަކާތަށް ފައިސާ ލިބުނު އަހަރު ކަމަށެވެ. މިއީ ރައީސް ޑރ މުއިއްޒުގެ ސަރުކާރުން ޒަކާތުގެ ޚާއްޞަ އިދާރާއެއްގެ އުފެެއްދުމުގެ ހެޔޮ ނަތީޖާ ކަމަށް ޝަހީމް ވިދާޅުވިއެވެ.

ޝަހީމް އިތުރަށް ވިދާޅުވީ އިސްލާމީ ކަންތައްތަކާއި ބެހޭ ވުޒާރާގެ އަމާޒަކީ އަހަރަކު މަދުވެގެން 100 މިލިއަން ރުފިޔާ ޒަކާތު ފަންޑަށް ހޯދުމް ކަމަށާއި އަދި ޝަރުޢީ އަސާސްގެ އަލީގައި ޒަކާތުގެ ޙައްޤުވެރިންނަށް ފުޅާދާއިރާއެއްގައި އެހީތެރިވުން ކަމަށެވެ.

ރާއްޖޭގެ ޒަކާތުގެ ނިޒާމް ހަރުދަނާކުރުމަށް ވަޒީރު ޝަހީމުގެ އިސްނެންގެވުމުގެ ދަށުން އައު ސަރުކާރުން މި އަހަރުގެ ތެރޭގައި ގިނަ މަސައްކަތްތަކެއް ވަނީ ކޮށްފައެވެ. އެގޮތުން ދިވެހިރާއްޖޭގެ ޒަކާތުގެ ނިޒާމު ހިންގުން ހަރުދަނާކޮށް، ޒަކާތުގެ މަސައްކަތްތައް ހިންގެވުމަށް ޓަކައި ދިވެހިރާއްޖޭގެ ޒަކާތު ހައުސްގެ ނަމުގައި ވަކި އިދާރާއެއް އުފައްދަވާން ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒު ވަނީ 15 ޑިސެމްބަރު 2023ގައި ނިންމަވާފައި އެވެ.

މިއާއިއެކު އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގާ އިދާރާއެއްގެ ގޮތުގައި ޒަކާތު ހައުސް އުފައްދަވައި، ޒަކާތު ހައުސް ރަސްމީކޮށް އިފްތިތާޙްކުރެއްވީ 2024 ޖަނަވަރީ 2ގައިއެވެ.