ދެކުނުގެ އަތޮޅުތައް ހުދު ސަމާލުގައި!

މޫސުން ގޯސްވާނެ ކަމަށް ލަފާކޮށް ދެކުނުގެ 5 އަތޮޅަށް ހުދު ސަމާލު ނެރެފި އެވެ.

މޫސުމާއި ބެހޭ ގައުމީ އިދާރާއިން ހުދު ސަމާލު ނެރެފައިވަނީ ލ އަތޮޅުން ފެށިގެން އައްޑޫ ސިޓީއާއި ހަމައަށް މިރޭގެ 10:30 އިން ފެށިގެން 15:30 ގެ ނިޔަލަށެވެ.

މޫސުމާއި ބެހޭ ގައުމީ އިދާރާއިން ލަފާކުރާ ގޮތުގައި އެސަރަހައްދަށް ބޯކޮށް ވާރޭވެހުމާއި އެކު ގުގުރުން އެކަށީގެންވެއެވެ.

ރާއްޖެއަށް މިހާރު ކުރަމުން އަންނަ ވިއްސާރާގައި އިއްޔެ އެންމެ ބޯކޮށް ވާރޭވެހުނީ ވެސް ދެކުނަށެވެ. އެގޮތުން އިއްޔެގެ ހެނދުނު 8 އިން މިއަދު ހެނދުނު 8 އަށް ރެކޯޑު ކުރެވިފައިވާ ތަފާސްހިސާބުތައް ދައްކާގޮތުގައި އިއްޔެ އެންމެ ގިނައިން ވާރޭ ވެހުނީ ގދ ފަރެސްމާތޮޑާއަށެވެ. އެގޮތުން އެރަށަށް އިއްޔެ 65.1 މިލިމީޓަރުގެ ވާރޭ ވެހިފައިވާކަމަށް ރެކޯޑްކުރެވިފައިވެއެވެ.

ރާއްޖެއަށް މިހާރު ކުރަމުން އަންނަ ވިއްސާރައަކީ ރާއްޖޭގެ ދެކުނުގައި އުފެދިފައިވާ ކޮޅިގަނޑެއްގެ ސަބަބަުން ކުރަމުން އަންނަ ވިއްސާރައެއް ކަން މޫސުމާއި ބެހޭ ގައުމީ އިދާރާގެ މޫސުމީ ފޯކަސްޓު ފޮޓޯތަކުން ދައްކައެވެ.