ރާއްޖޭގައި ފުޅާދާއިރާގައި ހަށިވިއްކުމުގެ ވިޔަފާރި ކުރަމުން ދިޔަ 9 މީހަކު އަތުލައިގެންފި

ރާއްޖޭގައި ފުޅާދާއިރާގައި ހަށިވިއްކުމުގެ ވިޔަފާރި ކުރަމުން ދިޔަ 9 މީހަކު އަތުލައިގެންފި އެވެ.

އިމިގްރޭޝަނުން މިއަދު ބުނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން ހިންގި ހާއްސަ އިންސްޕެކްޝަންތަކެއްގައި ބިދޭސީ 07 އަންހެނަކާއި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ 02 ފިރިހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި ކަމަށެވެ.

އެގޮތުން މި މައްސަލަތައް ތަހުޤީޤު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން 03 އަންހެނަކު މިހާރު ޑީޕޯޓުކޮށްފައި ވާއިރު، ބާކީ 06 ބިދޭސީން ޑީޕޯޓުކުރުމުގެ މަސައްކަތް ދަނީ ކުރަމުންކަން އެއިދާރާއިން ވަނީ ހާމަކޮށްފައެވެ.

އަތުލައިގަތް 9 މީހުންގެ ތެރޭގައި ހިމެނެނީ ބަންގްލަދޭޝް ގެ ދެ ފިރިހެނުންނާއި ވިއެޓްނާމުގެ 6 އަންހެނުންގެ އިތުރުން އުގަންޑާއަށް ނިސްބަތްވާ އަންހެނެކެވެ.

ރާއްޖޭގައި ހަށިވިއްކުމުގެ ވިޔަފާރިކުރަމުންދާ ބިދޭސީން ހޯދާ ފިޔަވަޅުއެޅުމަށް މޯލްޑިވްސް އިމިގްރޭޝަނާއި ދިވެހި ފުލުހުންގެ ޚިދުމަތުންވަނީ ޚާއްސަ އޮޕަރޭޝަނެއް ފަށާފައި އެވެ. އެގޮތުން މިދިޔަ މަހުގެ ތެރޭގައިވެސް މިފަދަ ދެ އޮޕަރޭޝަނެއްގައި 13 މީހުންވަނީ އަތުލައިގެންފައި އެވެ.