"ޙާލު ކިހިނެއް؟" ޕްރޮގްރާމް ރަސްމީކޮށް ރ އަތޮޅުގައި ފަށައިފި

ރައްޔިތުންގެ ގާތަށް ޒިޔާރަތްކޮށް، ދައުލަތުގެ ޚާއްސަ ސަމާލުކަމާއި އެހީތެރިކަން ބޭނުންވާ ފަރާތްތައް ދެނެގަތުމަށް އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާއިން ފަށައިގެން ކުރިއަށް ގެންދާ "ޙާލު ކިހިނެއް؟" ޕްރޮގްރާމް ރ އަތޮޅުގައި ފަށައިފިއެވެ.

މި ޕްރޮގްރާމު ރ އަތޮޅުގައި ކުރިއަށް ގެންދިއުމަށް ނިންމާފައިވަނީ ދެ ފިޔަވައްސަށް ބަހާލައިގެންނެވެ. އެގޮތުން ޑިސެމްބަރު 16 އިން 26 އަށް "ޙާލު ކިހިނެއް؟" ޕްރޮގްރާމުގެ ފުރަތަމަ ފިޔަވަހި އެ އަތޮޅުގެ 7 ރަށެއްގައި ކުރިއަށް ގެންދިއުމަށް ވަނީ ހަމަޖެހިފައެވެ.

އެގޮތުން މި މުއްދަތުގެ ތެރޭގައި، ރ. އިނގުރައިދޫ، އުނގޫފާރު، މީދޫ، ހުޅުދުއްފާރު، ފައިނު، ކިނޮޅަސް އަދި ރަސްމާދޫގެ މީހުން ދިރިއުޅޭ ގެތަކަށް ޒިޔާރަތްކޮށް ހާލަތު ދެނެގަތުމުގެ މަސައްކަތް ކުރިއަށް ގެންދާނެއެވެ.

ރ އަތޮޅުގައި މި ޕްރޮގްރާމު ކުރިއަށް ގެންދަނީ އަތޮޅު ކައުންސިލާއި ރަށު ކައުންސިލްތަކުގެ އެހީތެރިކަމާއި ބައިވެރިވުމާއި އެކުގައެވެ. މި ޕްރޮގްރާމު ކުރިއަށް ގެންދިއުމަށް ކައުންސިލްތަކުން ދެމުން ގެންދާ އެއްބާރުލުން އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއިން އުފަލާއިއެކު ފާހަގަކުރެއެވެ.