ފުލުހުންގެ ސާޖެންޓަކު ކުއްލި ގޮތަކަށް ނިޔާވެއްޖެ

ދިވެހި ފުލުހުންގެ ހިދުމަތުގައި މަސައްކަތްކުރަމުންދިޔަ ސާޖަންޓު ރޭންކުގެ ފުލުހަކު ކުއްލި ގޮތަކަށް ނިޔާވެއްޖެ އެވެ.

ނިޔާވީ ތ. ގުރައިދޫ ފޮލިސް ސްޓޭޝަނުގައި މަސައްކަތް ކުރައްވަމުން ގެންދަވާ ސާޖަންޓް ފާތިމަތު ރިފާއެވެ. އެގޮތުން ރިފާ ނިޔާވީ ރޭގެ ވަގުތެއްގައި އެވެ.

ގާފު ނޫހަށް މައުލޫމާތު ލިބިފައިވާގޮތުގައި ރިފާ ނިޔާވީ ސްޓްރޯކެއް ޖެހިގެންނެވެ. އަދި ސްޓްރޯކް ޖެހުނީ ޑިއުޓީ ނިންމާލުމަށްފަހު ގެއަށް ދިޔަތާ މާގިނަ އިރުތަކެއް ނުވެ ކަމަށްވެސް އެރަށުން މި ނޫހަށް މައުލޫމާތު ދިން ފަރާތަކުން ވަނީ ބުނެފައި އެވެ.

ރިފާ ނިޔާވުމާއި ގުޅިގެން ފުލުހުންގެ އިސްވެރިން ދަނީ ރިފާގެ އާއިލާއަށް ތައުޒިޔާ ކިޔަމުންނެވެ. އަދި ނައިބު ރައީސް ހުސެއިން މުހައްމަދު ލަތީފްވެސް ވަނީ ރިފާގެ އާއިލާއަށް ތައުޒިޔާ ވިދާޅުވެފައި އެވެ.

އެގޮތުން ރައިބު ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ތ.ގުރައިދޫ ޕޮލިސް ސްޓޭޝަންގައި މަސައްކަތްކުރައްވަމުން ގެންދެވި، ސަރޖަންޓް ފާތިމަތު ރިފާ ސ.ނަމްބަރ 3455، ނިޔާވި ޚަބަރު އެމަނިކުފާނު އެހީ ކުއްލި ހައިރާންކަމާއި ފުން ހިތާމައާއިއެކުގައި ކަމަށެވެ. އަދި މަރުޙޫމާ ފާތިމަތު ރިފާގެލޮބުވެތި ޢާއިލާއަށް އިޚްލާޞްތެރިކަމާއެކު ތަޢުޒިޔާ ދަންނަވައި މާތްﷲ މައްޔިތާގެ ފުރާނަ ޖަންނަތުލް ފިރުދައުސްގައި ލައްވުމަށްއެދި ނައިބު ރައީސް ދުއާދެންނެވި އެވެ.