އާއަހަރާއި ދިމާކޮށް ފުލުހުން މަސްތުވާތަކެތީގެ އޮޕަރޭޝަނެއް ފަށައިފި

އާ އަހަރާއި ދިމާކޮށް ފުލުހުންގެ ހާއްސަ އޮޕަރޭޝަނެއް ފަށާފައިވާ ކަމަށް ބުނެފިއެވެ.

ފުލުހުން މިއަދު ނެރުނު ކުރު ބަޔާނެއްގައި ބުނެފައިވަނީ އާ އަހަރާ ދިމާކޮށް ބަނގުރަލާއި މަސްތުވާތަކެތި ބޭނުންކޮށް، ވިޔަފާރި ކުރުން އިތުރުވެދާނެ ކަމަށް ބެލެވޭ ކަމަށާއި އެހެންކަމުން ޑްރަގް އެންފޯސްމަންޓް ޔުނިޓާއި މެރިން ޕޮލިހާއި ކ. އަތޮޅު ޕޮލިސް ސްޓޭޝަންތައް ގުޅިގެން އިއްޔެ ހާއްސަ އޮޕަރޭޝަނެއް ފަށާފައިވާ ކަމަށެވެ.

އެ އޮޕަރޭޝަންގައި ހުޅުމާލޭގެ ފަޅުތެރެ ޕެޓްރޯލް ކުރުމާއި ރަށުތެރެ އަށް ބަނގުރާ އަރުވައި، ވިއްކާ ކަމަށް ޝައްކު ކުރެވޭ ކެފޭ/ރެސްޓޯރަންޓްތައް މޮނީޓާކޮށް ގާނޫނާއި ގަވާއިދާ ހިލާފުވާ ފަރާތްތަކަށް ފިޔަވަޅު އަޅާނެ ކަމަށް ފުލުހުން ބުންޏެވެ.

ހުޅުމާލެ ފުލުހުންވެސް އިއްޔެ ވަނީ އާ އަހަރާއި ދިމާކޮށް އޮޕަރޭޝަން ރިވެލި ނަމުގައި ޚާއްސަ އޮޕަރޭޝަނެއް ފަށާފައި އެވެ. އެގޮތުން ފުލުހުން ބުނީ މި ޑިސެންބަރު މަހުގެ 24 ވަނަ ދުވަހުގެ ރެއިން ފެށިގެން ކުރިއަށް ގެންދާ މި އޮޕަރޭޝަންގައި ހުޅުމާލޭގެ އެކި ސަރަހައްދުތަކުގައި ސްޓެޓިކް ޑިއުޓީކޮށް، ވީ.ސީ.ޕީތައް އިތުރުކުރުމަށްވަނީ ހަމަޖެހިފަައިވާ ކަމަށެވެ. މީގެއިތުރުން ހުޅުމާލެ ފޭސް 1 ގެ ސަރަހައްދުތަކާއި ފޭސް 2 ގެ ސަރަހައްދުތައް ބެލެހެއްޓުން އިތުރުކުރުމާއި ފޭސް 3 ހިމެނޭ ސަރަހައްދަށް ވަދެނިކުމެ ހަދާ މީހުންނާއި އުޅަނދުތައް ބަލައިފާސްކުރުމަށްވަނީ ހަމަޖެހިފައެވެ. އަދި މި އޮޕަރޭޝަނުގެ ތެރެއިން ވެލާނާ އިންޓަރނޭޝަނަލް އެއަރޕޯޓްގެ ސަރަހައްދުތައްވެސް ޕެޓްރޯލްކޮށް ބެލެހެއްޓުމަށްވެސް ހަމަޖެހިފައިވެއެވެ.