17 އަހަރުންދަށް އަންހެން: އާޝާގެ މޮޅު ކުޅުމާއެކު އަހުމަދިއްޔާ ބަލިކޮށް އއ.އޭއީސީ ފައިނަލަށް

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުންދަށުގެ އަންހެން ސެމީ ފައިނަލް ފުރަތަމަ މެޗުގައި އަހުމަދިއްޔާ އިންޓަނޭޝަނަލް ސްކޫލާއި އއ. އަތޮޅު ތައުލީމީ މަރުކަޒް (އއ.އޭއީސީ) ކުޅުނު މެޗު 20-14 ގެ ނަތީޖާއަކުން ކާމިޔާބުކޮށް އއ.އޭއީސީ މުބާރާތުގެ ފައިނަލުން ޖާގަހޯދައިފިއެވެ.

އއ.އޭއީސީ މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލް ފުރަތަމަ މެޗުގައި ވާދަވެރި ކުޅުމަކަށްފަހު 20-22 ގެ ނަތީޖާއަކުން ހއ. އަތޮޅު ތައުލީމީ މަރުކަޒް ( ހއ. އެއީސީ) ބަލިކުރުމަށްފަހުއެވެ. އަދި އަހުމަދިއްޔާ ސެމީފައިނަލުން ޖާގަ ހޯދީ ކުއާޓާ ފައިނަލުގެ ތިންވަނަ މެޗުގައި 3-15 ގެ ތަފާތުބޮޑު ނަތީޖާއަކުން ރެހެންދި ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި މޮޅަށްކުޅެ އއ.އޭއީސީ މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ފަސް ލަނޑުގެ ލީޑަކާއެކު 6-11 ގެ ނަތީޖާއަކުން އއ.އޭއީސީ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެޓީމުން އިތުރު ނުވަ ލަނޑު ކާމިޔާބުކުރިއިރު، މިހާފުގައި އަހުމަދިއްޔާ އިން ވެސް ވަނީ އިތުރު އަށް ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު

އެގޮތުން މިމެޗުގައި އއ.އޭއީސީ ހައްވާ މިލްހަނާ މުހައްމަދު ޒާހިރު 10 ލަނޑު ކާމިޔާބުކުރިއިރު އެޓީމުގެ ފަތުމަތު އާޝާ ރަޝީދު ވަނީ ހަތް ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ތިން ލަނޑު ކާމިޔާބުކޮށްދިނީ އައިޝަތު ރުހާ އިލްހާމް އެވެ.

މީގެ އިތުރުން މިމެޗުގައި އަހުމަދިއްޔާ އިންޓަނޭޝަނަލް ސްކޫލްގެ އައިޝަތު ސަޖާހާ މުސްތަފާ އަދި ނަޖާ އަހުމަދު މިއިން ކޮންމެ ކުޅުންތެރިއަކު ހަތަރު ލަނޑު ކާމިޔާބުކުރިއިރު، އެޓީމުގެ ކީޕަރު އާމިނަތު ޝާޔާ ޝާތިރު ތިން ލަނޑު ކާމިޔާބުކުރިއިރު، އެޓީމުގެ އައުޝާ ނޫރުލް ސޮބާހް ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު އާމިނަތު އީމާ ނަސީރު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އއ.އޭއީސީ ފަތުމަތު އާޝާ ރަޝީދު އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ އަންހެން ޑިވިޝަނުގައި ޖުމްލަ 23 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 23 ޓީމު ފަސް ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ޓީމުގެ އިތުރުން ފަސް ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.