ހުޅުމާލޭގައި މިރޭ ހަވާ އަރުވަނީ

ހުޅުމާލޭގައި މިރޭ ހަވާ އަރުވާނެ ކަމަށް އެމްއެންޑީއެފުން ބުނެފި އެވެ.

އެމްއެންޑީއެފް އިން ބުނީ ހުޅުމާލޭ ސެންޓްރަލް ޕާކުގައި މިރޭ 20:30 ގައި ހަވާ އެރުވުމަށް ނިންމާފައިވާ ކަމަށެވެ. ހަވާ އެރުވުމަށް ނިންމާފައިވަނީ 2 މިނެޓަށެވެ.

މި ހަރަކާތަކީ ސިފްކޯއިން ވިޔަފާރި އުސޫލުން ކުރިއަށް ގެންދާ ހަރަކާތެއް ކަމަށްވެސް އެމްއެންޑީއެފުން ބުނެ އެވެ.

މައުލޫމާތު ލިބިފައިވާގޮތުގައި މިރޭ ހަވާއެރުވުމަށް ނިންމާފައިވަނީ ހުޅުމާލެ ސެންޓްރަލް ޕާކުގައި ފެށުމަށް ހަމަޖެހިފައިވާ ސައިބަރ އެކްސްޕޯގެ ހުޅުވުމުގެ ރަސްމިއްޔާތުގައި އެވެ.

ރާއްޖޭގައި ހަވާ އެރުވުމުގެ ކަންކަން ކުރިއަށް ގެންދަނީ ވިޔަފާރީގެ އުސޫލުން ސިފައިންގެ ވެލްފެއަރ ކުންފުނި ސިފްކޯ އިންނެވެ.