ފަހަތުން އަރައި ޑީއާރުސީ ބަލިކޮށް އޭއެސްއެމްއެޗު-އާރުސީ ޗެންޕިއަންކަން ހޯދައިފި

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ސެމީ ފައިނަލު ދެވަނަ މެޗުގައި މިރޭ އެންމެ ފަހުގެ ޗެންޕިއަން ދަޑެކޮޑޭ ރެކްރިއޭޝަން ކުލަބު (ޑީއާރުސީ) އާއި އަބްދުއްސަމަދު މެމޯރިއަލް ހޮސްޕިޓަލް ރެކްރިއޭޝަން ކުލަބު (އޭއެސްއެމްއެޗު-އާރުސީ) ވާދަކުރި މެޗު 3-1 ގެ ނަތީޖާއަކުން ކާމިޔާބުކޮށް އޭއެސްއެމްއެޗު-އާރުސީ އިން މުބާރާތުގެ ޗެންޕިއަންކަން ހޯފައިފިއެވެ.

އޭއެސްއެމްއެޗު-އާރުސީ މުބާރާތުގެ ފައިނަލުން ޖާގަހޯދީ ސެމީ ފައިނަލް ފުރަތަމަ މެޗުގައި އައުޓްލޯޒާއި ވާދަކޮށް 1-1 ގެ ނަތީޖާއަކުން ދެޓީމު އެއްވަރުވެ ނަތީޖާނެރުމަށްޓަކައިޖެހި ޕެނަލްޓީގައި 7-6 ގެ ނަތީޖާއަކުން ކުރިހޯދައިގެންނެވެ. އަދި ޑީއާރުސީ ފައިނަލުން ޖާގަހޯދީ ސެމީ ފައިނަލް ދެވަނަ މެޗުގައި 5-3ގެ ނަތީޖާއަކުން ޓީމު 401 ބަލިކުރުމަށް ފަހުއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ޑީއާރުސީ އިންނެވެ. މިލަނޑު ފުރަތަމަ ހާފުގެ ހަވަނަ މިނެޓުގައި ކާމިޔާބުކޮށްދިނީ އެޓީމުގެ އަލީ ޝިޔާހު އެވެ.

ނަމަވެސް އޭގެ ތިން މިނެޓްފަހުން އޭއެސްއެމްއެޗު-އާރުސީގެ އަލީ ހާފިޒް ހާއްޕެ ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ. އަދި އެޓީމުން މެޗުގެ ލީޑު ހޯދި ލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ ވެސް ހާއްޕެ އެވެ. އަދި މިއީ މިމުބާރާތުގައި ހާއްޕެ ކާމިޔާބުކުރި 10 ވަނަ ލަނޑެވެ.

މީގެ އިތުރުން ފުރަތަމަ ހާފުގެ އެންމެ ފަހު މިނެޓުގައި ޑިއާރުސީ އިން ހަ ފައުލް ހަމަވުމާއެކު އޭއެސްއެމްއެޗު-އާރުސީއަށް ދުރު ޕެނަލަޓީއެއްވެސް ލިބުނެވެ. ނަމަވެސް ހާއްޕެ ކުރިއަށް ފޮނުވާލި ދުރު ޕެނަލްޓީ ޑީއާރުސީގެ ކީޕަރު ބައްސާމް ވަނީ ހުޝިއާރުކަމާއެކު ދިފާއުކޮށްފައެވެ. އަދި މިއާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އޭއެސްއެމްއެޗު-އާރުސީ ކުރީގައި އިވެގެންނެވެ.

މެޗުފެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި މިމެޗުގައި އޭއެސްއެމްއެޗު-އާރުސީ އިން ކާމިޔާބުކުރި ތިންވަނަ ލަނޑަކީ މެޗު ނިމެން ދެމިނެޓަށްވެފައި ވަނިކޮށް ޑީއާރުސީގެ އިބްރާހިމް މުހައްމަދު އަތުން ބައިކޮޅަށް ވަން ލަނޑެކެވެ. އަދި މިލަނޑާއެކު 3-1 ގެ ނަތީޖާއަކުން އޭއެސްއެމްއެޗު-އާރުސީ ކުރީގައި އޮވެގެން މެޗު ނިމުނުއިރު، ފައިނަލް މެޗުގެ މޮޅު ކުޅުންތެރިއަކަށް ހޮވުނީ އޭއެސްއެމްއެޗު-އާރުސީގެ އަލީ ހާފިޒް ހާއްޕެއެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އަލީ ޝިޔާހް (ޑީއާރުސީ)، އިބްރާހިމް މުހައްމަދު (ޑީއާރުސީ)، ހަސަން ސައީދު (އޭއެސްއެމްއެޗު)، އަލީ ހާފިޒް (އޭއެސްއެމްއެޗު) އަދި އަޔާޒް އަހުމަދު (އައުޓްލޯޒް) އެވެ. އަދި މުބާރާތުގެ އެންމެ ގިނަ ލަނޑުޖެހި ކުޅުންތެރިއާގެ މަގާމާއި އެންމެ މޮޅު ކުޅުންތެރިއާގެ މަޤާމު ހޯދީ އަލީ ހާފިޒް (އޭއެސްއެމްއެޗު) އެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރިއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ،ވޯޓާ ޑެކް އަދި އަލިކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.