ސްޓެލްކޯގެ ކުޑަކުދިންގެ ހަވީރެއް މާދަމާ މާލޭގައި!

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ކުޑަކުދިންގެ ޚާއްޞަ ހަވީރެއް ބޭއްވުމަށް ތައްޔާރުވެއްޖެ އެވެ.

ސްޓެލްކޯއިން މިއަދު ބުނީ މި ހަވީރަކީ ވޭތުވެދިޔަ 6 މަސްދުވަހުގެ ތެރޭގައި ސްޓެލްކޯ ބިޒްނަސް ސެންޓަރު އިމާރާތްކުރުމުގެ މަސައްކަތް ވަރަށް ފުރިހަމައަށް ނިންމާލުމަށް ބުރަކޮށް މަސައްކަތްކުރި މުވައްޒަފުންގެ ހިތްވަރާއި، ޖޯޝާއި، މަސައްކަތުގެ ނަމޫނާ އަޚްލާޤު ފާހަގަކުރުމުގެ ކުރުމުގެ ގޮތުން ބާއްވާ ހަވީރެއް ކަމަށެވެ. އަދި މި ހަވީރަކީ އެ މުވައްޒަފުންގެ ހުނަރުވެރިކަން އެ މުވައްޒަފުންގެ ޢާއިލާތަކަށް ދައްކާލުމުގެ ފުރުޞަތެއް ކަމަށްވެސް ސްޓެލްކޯއިން ވަނީ ބުނެފައި އެވެ.

ސްޓެލްކޯގެ މި ހަވީރު ބޭއްވުމަށް ހަމަޖެހިފައިވަނީ ސްޓެލްކޯ ބިޒްނަސް ސެންޓަރު އިމާރާތުގައި އެވެ.

މި ހަވީރުގެ ޙަރަކާތްތައް ކުރިޔަށް ގެންދިޔުމަށް ނިންމާފައިވަނީ ދެ ދަންފަޅިއަކަށް ބަހާލައިގެންނެވެ. އެއީ ހަވީރު 16:00 އިން 18:00 އަށް ކުރިޔަށް ގެންދާ ދަންފަޅި އަކާއި، ރޭގަނޑު 20:00 އިން 21:30 އަށް ކުރިޔަށް ދާ ދެވަނަ ދަންފަޅި އެވެ.

މި ހަވީރަކީ ހަމައެކަނި ސްޓެލްކޯގެ މުވައްޒަފުންގެ ޢާއިލާތަކުގެ ކުޑަކުދިންނަށް އަމާޒުކޮށްގެން ބާއްވާ ހަވީރެއް ނޫން ކަމަށާއި، ހުރިހާ ކުޑަކުދިންނަށް ހުޅުވާލައިގެން ބާއްވާ ހަވީރެއް ކަމަށްވެސް ސްޓެލްކޯއިން ބުންޏެވެ. އެހެންކަމުން، މި ހަވީރުގައި ބައިވެރިވުމަށް ހުރިހާ ކުޑަކުދިންނަށް އެކުންފުނިން ވަނީ ދައުވަތު އަރުވާފައި އެވެ.