ޒަކިއްޔާގެ މަރުގައި އެހެން މީހެއްގެ ބައިވެރިވުމެއް އޮތް ކަމުގެ ހެއްކެއް އަދި ނެތް - ފުލުހުން

ނ. ހޮޅުދޫގައި ޒަހަމްތަކަކާއެކު މަރުވެފައި އޮއްވައި ފެނުނު އެ ރަށު ނިއުލައިފް، ޒަކިއްޔާ މޫސާގެ މަރުގައި އެހެން މީހެއްގެ ބައިވެރިވުމެއް އޮތް ކަމެއް އަދި މިހާތަނަށް ތަހުގީގަށް ހާމަވެފައި ނުވާ ކަމަށް ދިވެހި ފުލުހުންގެ ހިދުމަތުން ބުނެފި އެވެ.

ޒަކިއްޔާގެ މަރުގެ ތަހުގީގާއި ގުޅޭގޮތުން މިއަދު ފުލުހުން ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ މޭޖަރ ކްރައިމްސްގެ ހެޑް މުހައްމަދު ސާމިހް ވިދާޅުވީ ޒަކިއްޔާ ދިރިހުއްޓާ އެންމެ ފަހުން ފެނިފައިވަނީ އެ ދުވަހު ހެނދުނު 08:40ގައި އޭނާގެ ޅީ ދަރިފުޅަށް ކަމަށެވެ. އަދި ޒަކިއްޔާ މަރުވެފައި އޮއްވާ އެންމެ ފުރަތަމަ ފެނުނީ އެ ދުވަހު 09:43ގައި ކަމަށާއި އޭނާގެ ހަށިގަނޑު އެންމެ ފުރަތަމަ ފެނުނީ އެގެޔަށް ކުނި ނަގަން ދިޔަ ބަޔަކަށް ކަމަށެވެ. ޒަކިއްޔާގެ ޕޯސްޓްމޯޓަމްއެއް ހަދާފައި ނުވި ނަމަވެސް ތަހުލީލުތަކުން ފާހަގަވާ ގޮތުގައި މަރުވެފައި އޮއްވާ ފެނުނުއިރު، މަރުވި ވަގުތުގެ ކުރިޔަށް ދެ ގަޑިއިރަށް ވުރެ ގިނަ އިރު ވެފައިނުވާކަން ކަށަވަރުވެފައިވާ ކަމަށްވެސް ސާމިހް ވިދާޅުވިއެވެ.

ސާމިހް ވިދާޅުވީ ޒަކިއްޔާ މަރުވެފައި އޮއްވާ ފެނުނީ އެގޭގެ ގުދަނުގެ ތެރޭގައި ކަމަށާއި އެގުދަނަކީ ގޭތެރެއިންނާއި މަގުމައްޗަށް ވާ ގޮތަށް ދެ ދޮރު ލާފައި ހުރި ތަނެއް ކަމަށެވެ. ފުލުހުން ވަނީ އެ ގުދަނުގެ ފޮޓޯތަކާއި ގުދަނަށް ވަންނަން ހުންނަ ދެ ދޮރުގެ ފޮޓޯވެސް މިއަދު މީޑީއާތަކަށް ދައްކާލާފައި އެވެ.

މި މައްސަލައިގެ ތަހުގީގަށް އެންމެ ބޮޑަށް ބޭނުންކޮށްފައިވަނީ ސީސީޓީވީއެއްގެ ފުޓޭޖުތަކެއް ކަން ފުލުހުން މިއަދު ހާމަކުރި އިރު ސާމިހް ވިދާޅުވީ ޒަކިއްޔާ މަރުވި ކަމަށް ބެލެވޭ ވަގުތުން ފެށިގެން އޭނާ ފެނުމާ ހަމައަށް އިތުރު މީހަކު ގުދަނަށް ވަދެފައި ނުވާކަން ސީސީޓީވީގެ ފުޓޭޖުތަކުން ކުރެވިފައިވާ ކަމަށެވެ.

ފުލުހުން މިއަދު ވަނީ ޒަކިއްޔާގެ ހަށިގަނޑުގައި ހުރި ޒަހަމްތަކުގެ ތަފްސީލްތައްވެސް ހާމަކޮށްފައެވެ.

1. ޒަކިއްޔާގެ ހަށިގަނޑު ބެލި ބެލުމުން އޭނާގެ ކަރުގެ ދެފަރާތުގައި ތޫނު އެއްޗަކުން ލިބިފައިވާ ގިނަ ޒަޚަމްތަކެއް
2. ކަރުގެ ވާތްފަޅީގައި ފުން ތިން ޒަޚަމް
3. ކަނާތްފަރާތުގައި ފުން ދެ ޒަޚަމް
4. ކަރުގެ މެދާ ހިސާބުގައި ތިލަކޮށް އެއް ޒަޚަމް

މި ޒަހަމްތަކުގެ އިތުރުން އެއްވެސް އިތުރު ޒަހަމެއް ހަށިގަނޑުން ފެންނަން ނެތްކަމަށް ފުލުހުން ވިދާޅުވިއެވެ. އަދި ޒަކިއްޔާގެ ހަށިގަނޑުގެ ތަހުލީލުތައް ކުރިޔަށް ގެންގޮސްފައިވަނީ މާލެ ގެނެސް ޕެތޮލޮޖިސްޓް ޑޮކްޓަރެއް މެދުވެރިކޮށް ކަމަށާއި އާއިލާއާއި ހަށިގަނޑު ހަވާލުކޮށްފައިވަނީ ހުރިހާ ތަހުލީލުތަކެއް ފުރިހަމަ ކުރުމަށްފަހުގައި ކަމަށް ފުލުހުން ހާމަކުރިއެވެ.

ސާމިހް އިތުރަށް ވިދާޅުވީ ޒަކިއްޔާގެ ހަށިގަނޑު ފެނުނު އިރު ކައިރީގައި ވަޅިއެއް އޮތް ކަމަށާއި އެވަޅީގައި ހުރީ ޒަކިއްޔާގެ ލޭކަން ކަށަވަރުވެފައިވާ ކަމަށެވެ. ނަމަވެސް ވަޅިން އެއްވެސް މީހެއްގެ އިނގިލީގެ ނިޝާން ފެނުނު ކަމެއް ހާމަނުކުރައްވައި ސާމިހް ވިދާޅުވީ ވަޅީގެ ތަހުލީލުތަކެއް މިހާރުވެސް ކުރިޔަށްދާ ކަމަށެވެ.

މި މައްސަލައާ ގުޅިގެން އުފެދިފައިވާ ތަފާތު ސުވާލުތަކުގެ ޙަޤީޤަތް ދެނެގަތުމަށް ތަޙުޤީޤު ކުރެވެން ހުރި އެންމެހައި މަސައްކަތެއް ކުރެވިފައިވާކަން ފާހަގަކުރައްވައި ސާމިހު ވިދާޅުވީ ނޮވެމްބަރު 25 ވަނަ ދުވަހު ތަޙުޤީޤު ޓީމު ދެވަނަ ފަހަރަށް ނ. ހޮޅުދޫއަށް ގޮސް އިތުރު މަސައްކަތްތަކެއް ކޮށްފައިވާކަމަށެވެ. އަދި މިހާތަނަށް ތަޙްޤީޤުން ހޯދުނު ހޯދުންތަކުން ޒަކިޔާ އަށް ލިބިފައިވާ އަނިޔާގެ ޒަޚަމުތަކަކީ ނުވަތަ ޒަކީޔާ މަރުވެފައި ވަނީ އިތުރު އެއްވެސް ފަރާތެއްގެ ޢަމަލެއްގެ ސަބަބުން ދޭހަކޮށްދޭނެ އެއްވެސް ހެއްކެއް ފެންނަން ނެތުމާ އެކު މި މައްސަލައިގައި އިތުރަށް އިތުރު މީހެއްގެ ބައިވެރިމެއް އޮތް ކަމަށް ތަޙުޤީޤަށް މިހާތަނަށް ފާހަގަކުރެވިފައިނުވާކަމަށް ސާމިހް ވިދާޅުވިއެވެ.

ދިރިއުޅެމުން ދިޔަ ގޭގެ ތެރޭގައި ބޮޑެތި ޒަހަމްތަކަކާ އެކު ޒަކިއްޔާ މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10 ވަނަ ދުވަހު ހެނދުނު އެވެ. ފުލުހުން މިއަދު ނޫސްވެރިންގެ ބައްދަލުވުމެއް ބޭއްވި އިރު ޒަކިއްޔާގެ މަރަށް އިންސާފު ނުލިބި ދިގުލައިގެންދާތީ ހޮޅުދޫގެ ރައްޔިތުން މިދިޔަ ހޯމަ ދުވަހު ވަނީ އިހުތިޖާޖަށް ނުކުމެ، އަޑު އުފުލައިފަ އެވެ.