ސަރުކާރުގެ އަމާޒަކީ އަނިޔާ މަދުކުރެވޭނެ ގޮތަކަށް މަސައްކަތްތައް ރާވައި ބައްޓަންކުރުން - ޝިހާމް

ވަކި ޖިންސަކަށްވީތީ ތަހައްމަލް ކުރަންޖެހޭ އަނިޔާ އަދި ގެވެށި އަނިޔާގެ މައްސަލަތައް މި ވުޒާރާއަށް ކޮންމެ އަހަރަކު ވެސް ހުށަހެޅޭ ކަމަށާއި، ދިވެހި ސަރުކާރުގެ މިހާރުގެ ސިޔާސަތު ކަމުގައިވާ "އޯގާތެރި މުޖްތަމަޢު" އަކީ މިފަދަ އަނިޔާވެރިކަން ނައްތާލުމަށް ކުރާ މަސައްކަތާ ސީދާ ގުޅިފައިވާ ކަމެއް ކަމަށާއި، މި ސަރުކާރުގެ އަމާޒަކީ މިފަދަ އަނިޔާ މަދުކުރެވޭނެ ގޮތަކަށް މަސައްކަތްތައް ރާވައި ބައްޓަންކުރުން ކަމަށް ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ވަޒީރު މިހެން ވިދާޅުވެފައިވަނީ ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) އިން ބާއްވާ 2 ދުވަހުގެ މަދަނީ ޖަމުޢިއްޔާތަކުގެ މަހާސިންތާގެ ހުޅުވުމުގެ ރަސްމިއްޔާތުގެ ޝަރަފުވެރި މެހެމާނެއްގެ ގޮތުގައި ބައިވެރިވެ މުޚާތަބުކުރައްވަމުންނެވެ.

މީގެ އިތުރުން، ހުރިހާ ރައްޔިތުންނަށް ބޭނުންވާ ރައްކާތެރިކަމާއި ހިމާޔަތް ލިބިދެވޭ އަމާން މާޙައުލެއް ގާއިމުކޮށް، އެއްވެސް ފަރުދަކު ބާކީ ނުވާނެހެން އެންމެން ޝާމިލުވެ އުޅޭ އުފާވެރި އޯގާތެރި މުޖުތަމަޢެއްގެ ގޮތުގައި މި މުޖުތަމަޢު ތަރައްޤީކުރުމަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ތަޞައްވުރުކަން ވެސް ވަޒީރު ފާހަގަކުރެއްވިއެވެ.

މިގޮތުން ސަރުކާރުގެ ސިޔާސަތުތަކާއި އަދި އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ މަސައްކަތްތައް ބައްޓަންކުރެވިގެންދަނީ ރައީސުލްޖުމްހޫރިއްޔާގެ މި ތަޞައްވުރާ އެއްގޮތަށް ޢާއިލީ ރައްކާތެރިކަމާއި، އިޖްތިމާޢީ ހަމަޖެހުން ޤާއިމުކުރުމާއެކު، އެކި ބާވަތުގެ ހާނިއްކަ (އެބިއުސް) އާއި އަނިޔާ ލިބިފައިވާ އަންހެނުންނާއި، ކުޑަކުދިންނާއި، އިސްރަށްވެހީންނާއި ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހިމާޔަތާއި ރައްކާތެރިކަން ފޯރުކޮށްދެވޭނެ ނިޒާމެއް ޤާއިމުކޮށް އެ އަމާޒަށް ވާޞިލުވެވޭނެ ގޮތަށް ކަން ވަޒީރު ވިދާޅުވިއެވެ.

ހަމައެއާއެކު ގެވެށި އަނިޔާ ނުވަތަ ވަކި ޖިންސަކަށް ވީތީވެ ކުރާ އަނިޔާގެ ޝިކާރައަކަށްވާ ފަރާތްތަކަށް ގެވެށި އަނިޔާ ހުއްޓުވުމުގެ ޤާނޫނުގެ ދަށުން މި ވުޒާރާއަށް މަތިކުރެވިފައިވާ ޒިންމާތައް ހަރުދަނާކަމާއެކު ކުރިއަށް ގެންދިއުމަށް ގިނަގުނަ މަސައްކަތްތަކެއް ކުރެވެމުންދާކަމަށާއި، ގެވެށި އަނިޔާގެ މައްސަލަތައް ރިޕޯޓްކުރުމަށް 24 ގަޑިއިރު ޚިދުމަތްދޭ ހެލްޕްލައިންގެ އެހީގައި ގިނަ ފަރާތްތަކަކަށް އަވަސް އެހީއެއް ފޯރުކޮށްދެވޭކަން ވެސް ވަޒީރު ވިދާޅުވިއެވެ. އަދި ގެވެށި އަނިޔާގެ ޝިކާރައަކަށްވާ ފަރާތްތަކަށް ވަގުތީ ގޮތުން ރައްކާތެރިކަން ފޯރުކޮށްދޭ މަރުކަޒުތައް އިތުރަށް ތަރައްޤީކޮށް އެ މަރުކަޒުތަކުންދޭ ޚިދުމަތްތަކުގެ ފެންވަރު ރަނގަޅުކޮށް އެފަދަ އިތުރު 03 މަރުކަޒެއް ރާއްޖޭގެ 03 ސަރަހައްދެއްގައި ޤާއިމްކުރުމުގެ މަސައްކަތް މިހާރު ވަނީ ފެށިފައިކަން ވަޒީރު ފާހަގަކުރެއްވިއެވެ.

އަނިޔާ ލިބޭ އެންމެހާ ފަރާތްތަކުގެ ޙައްޤު ހިމާޔަތްކޮށް ރައްކާތެރިކޮށްދިނުމަށްޓަކައި ސަރުކާރުގެ އެންމެ ބޮޑު އެއް އަމާޒަކީ އަނިޔާ ލިބޭ ފަރާތްތަކަށް އަވަސް މިނެއްގައި ފެންވަރު ރަނގަޅު ޚިދުމަތްތަކަށް ލިބޭނެ އިންތިޒާމް ހަމަޖައްސައިދީ އެފަރާތަށް ލިބިފައިވާ އަނިޔާއިން އަރައިގަތުމަށް ބޭނުންވާ އެހީތެރިކަން ފޯރުކޮށްދީ ރައްކާތެރި މާހައުލެއް ކަށަވަރުކުރުން ކަން ފާހަގަކޮށް ވަޒީރު ވިދާޅުވީ، އަންހެނުންނަށް ކުރާ އަނިޔާތައް ހުއްޓުވުމަށް އަދި އެފަދަ އަނިޔާ ލިބޭ ފަރާތްތަކަށް ބޭނުންވާ އެހީތެރިކަމާއި، އޯގާވެރިކަމާއި، ރައްކާތެރިކަމާއި، އިންސާފު ކަށަވަރު ކުރުމަށް ޚާއްޞަ ޤައުމީ މަރުކަޒެއް ޤާއިމުކުރުމަކީ ރައީސް ޑރ. މުހައްމަދު މުޢިއްޒުގެ މެނިފެސްޓޯގައި ހިމެނިފައިވާ މުހިއްމު ވަޢުދުފުޅެއް ކަމަށެވެ. އަދި މިކަމަށް މަގުފަހިކުރުވުމަށާއި ގެވެށި އަނިޔާ ހުއްޓުވުމުގެ ޤާނޫނީ އޮނިގަނޑު އިތުރަށް ހަރުދަނާކޮށް ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) ޚިދުމަތްދޭ ފަރާތްތައް ޖަވާބުދާރީކުރުވާ މަރުކަޒުކަމުގައި އެކަށައެޅި ޤާނޫނު ނަންބަރު 2012/3 (ގެވެށި އަނިޔާ ހުއްޓުވުމުގެ ޤާނޫނު) ގެންނަންޖެހޭ އިސްލާހުތައް ގެނައުމުގެ މަސައްކަތްތައް މިހާރު ވަނީ ފެށިފައިކަމަށެވެ.