ތިނަދޫގެ ސިޓީގެ ދަރަޖަ ބާތިލުކުރުމުގެ މައްސަލަ މޭޔަރު ސިފަކުރެއްވީ ރައީސްއާއި ދެކޮޅަށް ޑެޕިއުޓީ މިނިސްޓަރަކު ކުރާ ބަގާވަތެއްގެ ގޮތުގައި!

ރާއްޖޭގައި އެންމެ ފަހުން ސިޓީގެ ދަރަޖަ ދިން ތިނަދޫގެ އެދަރަޖަ ބާތިލުކުރަން ހައިކޯޓަށް ހުށަހަޅާފައިވާ މައްސަލައަކީ ރައީސުލުމްޖުމްހުރިއްޔާ ޑރ މުހައްމަދު މުއިއްޒު އާއި ދެކޮޅަށް އެމަނިކުފާނު ދެއްވި ސިޔާސީ މަގާމެއްގައި ހުންނެވި ބޭފުޅަކު ކުރައްވާ ބަގާވާތެއްގެ ގޮތުގައި ތިނަދޫ ސިޓީގެ މޭޔަރު ސައުދު އަލީ ސިފަކުރައްވައިފި އެވެ.

ގދ. ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް ދުސްތޫރީ މައްސަލައެއް މިދިޔަ ބުރާސްފަތި ދުވަހު ހުށަހެޚުއްވީ އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބެވެ. މި މައްސަލަ ރާގިބް ހައިކޯޓަށް ހުށަހެޅީ އޮޅުވާލައިގެން ތިނަދޫ އަށް ސިޓީގެ ދަރަޖަ ދިން ކަމަށްބުނެ ރައީސް އޮފީހާއި ތިނަދޫ ކައުންސިލާއި ކުރީގެ ރައީސް އިބްރާހިމް މުހައްމަދު ސޯލިހާއި ދެކޮޅަށެވެ.

އެގޮތުން އޭނާ ހުށަހެޅި މައްސަލާގައި ވަނީ ތިނަދޫއަށް ރައީސް އޮފީހުގެ ގަރާރަކުން ސިޓީގެ ދަރަޖަ ދީފައިވަނީ އާބާދީ އާއި ގުޅޭގޮތުން ދައުލަތުގެ ލިޔުމެއް ގަސްދުގައި އޮޅުވާލައި، ދައުލަތުގެ އިދާރާއަކަށް ދޮގު މައުލޫމާތު ދީގެން ކަމަަށް ތުހުމަތުކޮށް ކައުންސިލާއި ކުރީގެ ރައީސުލްޖުމްހޫރިއްޔާގެ މައްސަލަ ބެލުމަށާއި ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދޭންށެވެ.

މިކަމާއި ގުޅިގެން މިއަދު ގާފު ނޫހަށް ދެއްވި އިންޓަވިއުއެއްގައި ތިނަދޫ ސީޓީގެ މޭޔަރު ސައުދު އަލީ ވިދާޅުވީ މި މައްސަލައަކީ ރައީސް ޑރ މުހައްމަދު މުއިއްޒު ދެއްވި ސިޔާސީ މަގާމެއްގައި ހުންނެވި ރާގިބު ތިނަދޫއާއި މެދު ގެންގުޅޭ ޒަމާންވީ ޒާތީ ހަސަދަވެރިކަމެއްގެ ތެރެއިން ރާއްޖޭގެ ވަލިއްޔުލްއަމުރާއި ދެކޮޅަށް ކުރާ ބަގާވާތެއްގެ ގޮތުގައި ހުށަހެޅި މައްސަލައެއް ކަމަށެވެ. އެގޮތުން މި މައްސަލަ ހުށަހަޅާފައިވަނީ ރައީސް އޮފީހާއި ދެކޮޅަށް ކަމުން މިއީ އެއޮފީހުގެ އެންމެ އިސްވެރިޔާ އަދި ރާއްޖޭގެ ރައީސުލްޖުމްހުރިއްޔާގެ ގޮތުގައި މިވަގުތު ހުންނެވި ޑރ މުހައްމަދު މުއިއްޒުއަށްވެސް ގޮން ޖައްސަވައި ރާގިބު ހުށަހެޅުއްވި މައްސަލައެއް ކަމަށް ސައުދު ވިދާޅުވިއެވެ.

ސައުދު ވިދާޅުވީ ކައުންސިލުން އާބާދީގެ މައުލޫމާތު އޮޅުވާލާފައިވާކަމަށް ރާގިބު ހުށަޙެޅި މައްސަލާގައި ފާހަގަކޮށްފައިވި ނަމަވެސް އެލިސްޓު ރިވިއުކޮށް ތިނަދޫއަކީ ސިޓީގެ ދަރަޖަ ދެވޭ ވަރުގެ ރަށެއްކަން ކަނޑައަޅާފައިވަނީ ރައީސް އޮފީހާއި ސަރުކާރުގެ ކަމާބެހޭ ފަރާތްތަކުން ބަލަންޖެހޭ ކަންކަން ބެލުމަށްފަހުގައި ކަމަށް ކައުންސިލުން ގަބޫލުކުރާ ކަމަށެވެ. އަދި މިއީ އާބާދީގައި މައްސަލައެއް އޮވެގެން ހުށަހެޅި މައްސަލައެއް ކަމަށް ދެކެވަޑައިނުގަންނަވާ ކަމަށާއި ސިޓީގެ ދަރަޖަ ލިބުނުތާ އެއްއަހަރު ދުވަހަށް ފަހު މިފަދަ މައްސަލައެއް ހުށަހަޅާފައިމިވަނީ ތިނަދޫގެ ރައްޔިތުންނަށް ލިބިގެންދާ މަންފާތަކާއި ތިނަދޫގެ ކުރިއެރުމަށް ބަޔަކު ގެންގުޅޭ ޒަމާންވީ ޒާތީ ހަސަދަވެރިކަމެއްގެ ސަބަބުން ތިނަދޫއަށް ދެރަގޮތް އެދޭތީ ކަމަށެވެ.

އަދި އެފަރާތްތަކަށް މިފަދަ ނާތަހުޒީބު ކަންކަމުން ދުރުވުމަށް އިލްތިމާސްކުރާކަމަށްވެސް ސައުދު ފާހަގަކުރެއްވި އެވެ. އަދި މިއީ ރާއްޖޭގެ ރައީސުލުޖްމްހުރިއްޔާއި ދެކޮޅަށް ހުށަހަޅާފައިވާ މައްސަލައެއް ކަމުން ރައީސް އާއި ތިނަދޫގެ ދިފާއުގައި ތިނަދޫގެ ދެ ދާއިރާގެ މެމްބަރުންނާއި ރައްޔިތުން ނުކުމެ އަޑުއުފުލުމަށް ސައުދު ވަނީ ގޮވާލައްވާފައި އެވެ.

ހައިކޯޓަށް ހުށަހެޅުނު މައްސަލާގައި ކައުންސިލުން އަމަލުކުރާނެ ގޮތަކާއި މެދު ސުވާލުކުރުމުން ސައުދު ވިދާޅުވީ މި މައްސަލަ އަދި މިހާތަނަށް ހައިކޯޓުން ބަލައިގެންފައިނުވާ ކަމަށާއި މައްސަލައާއި މެދު ކައުންސިލުން އަމަލުކުރާނެ ގޮތެއް ނިންމާނީ ކޯޓުން މައްސަލަ ބަލައިގަތުމުން ކަމަށެވެ. އަދި މައްސަލައާއި މެދު ކަންބޮޑުނުވާކަމަށްވެސް ސައުދު ވިދާޅުވިއެވެ.

ތިނަދޫއަށް ސިޓީގެ ދަރަޖަ ދިނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހުގެ ގަރާރަކުންނެވެ. އެގޮތުން ސިޓީގެ ދަރަޖަ ދިނުމުގެ ކުރިން އޭރުގެ ރިޔާސީ ކެނޑިޑޭޓު އަދި މިހާރުގެ ރައީސް ޑރ މުހައްމަަދު މުއިއްޒު ވެސް ވަނީ ތިނަދޫއަށް ސިޓީގެ ދަރަޖަ ދެއްވާނެކަން އިއުލާނުކުރައްވާފައި އެވެ.

ތިނަދޫއަށް ސިޓީގެ ދަރަޖަ ދެއްވުމަށް ފަހު އޭރުގެ ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ ލާމަރުކަޒީ ގާނޫނުގައިވާ ބުނާ ހުރިހާ ޝަރުތުތަކެއް ފުރިހަމަ ވާތީ ތިނަދޫ ސިޓީއަކަށް ހަދަން ނިންމައި، ގަރާރުގައި ސޮއިކުރެއްވީ ކަމަށެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ މިންގަނޑުގެ ތެރޭގައި އާބާދީ 10،000 އަށް ވުރެ ދަށްނުވުން ހިމެނެ އެވެ.