ވޯލްޑް ލީޑިންގ ޑެސްޓިނޭޝަންގެ ލަގަބު ޖެހި ޖެހިގެން ފަސްވަނަ ފަހަރަށް ރާއްޖެއަށް!

ވޯލްޑް ޓްރެވަލް އެވޯޑްސް ގައި ވޯލްޑްސް ލީޑިން ޑެސްޓިނޭޝަންގެ ލަގަބު ޖެހިޖެހިގެން ފަސް ވަނަ ފަހަރަށް ރާއްޖެއިން ހޯދައިފި އެވެ.

މި އެވޯޑު ރާއްޖެއަށް ލިބިފައިވަނީ ޕޯޗުގަލްގެ މަޑެއިރާގައި އިއްޔެ ބޭއްވި ރަސްމިއްޔާތެއްގައި އެވެ.

ޓުއަރިޒަމް މިނިސްޓްރީން މިއަދު ބުނީ މިޚާއްސަ އެވޯޑަކީ މިއަހަރުގެ ކުރީކޮޅު ދުބާއީގައި ބޭއްވި އަރަބިއަން ޓްރެވަލް މާކެޓް (އޭޓީއެމް) 2024 ގައި ބޭއްވި ވޯލްޑް ޓްރެވަލް އެވޯޑްސް (އިންޑިއަން އޯޝަން ކެޓަގަރީ) ގައި ރާއްޖެއަށް ލިބުނު ގިނަ އެވޯޑުތަކާއި އެކު ރާއްޖެއަށް ލިބުނު ބޮޑު ކާމިޔާބީއެއް ކަމަށެވެ. އެގޮތުން އޭޓީއެމްގައި ރާއްޖެއަށް ވަނީ އިންޑިއަން އޯޝަންސް ލީޑިންޑެސްޓިނޭޝަނާއި އިންޑިއަން އޯޝަންސް ލީޑިން ގ ހަނީމޫން ޑެސްޓިނޭޝަން، އިންޑިއަން އޯޝަންސް ލީޑިންގ ގްރީން ޑެސްޓިނޭޝަން އަދި އިންޑިއަން އޯޝަންސް ލީޑިންގ ޑައިވް ޑެސްޓިނޭޝަންގެ ޝަރަފު ލިބިފައި އެވެ.

ޓުއަރިޒަމް މިނިސްޓްރީން ބުނީ މި ތާރީހީ ކާމިޔާބީއަކީ ދުނިޔޭގެ ފަތުރުވެރިކަމުގެ އެންމެ ކާމިޔާބު އެއް މަންޒިލުގެ ގޮތުގައި ޖެހިޖެހިގެން ފަސްވަނަ ފަހަރު ރާއްޖެއަށް ލިބުނު އެވޯޑާއި އެކު ފަތުރުވެރިކަމުގެ މަންޒިލެއްގެ ގޮތުގައި ރާއްޖެއިން ކުރަމުންދާ ތަފާތު ކަންކަމާއި ރާއްޖޭގެ ގުދުރަތީ ތިމާވެށި ހިމާޔަތްކޮށް ދެމެހެއްޓެނިވި ގޮތެއްގައި ފަތުރުވެރިކަމުގެ އާދަތައް ކުރިއެރުވުމަށް ކުރާ މަސައްކަތް ދައްކުވައިދޭ ކާމިޔާބެއް ކަމަށެވެ.

ރޭގެ އެވޯޑު ހަފްލާގައި ރާއްޖޭގެ އެވޯޑުތަކާއި ހަވާލުވެވަޑައިގެންނެވުމަށްފަހު ޓޫރިޒަމް މިނިސްޓަރ އިބްރާހީމް ފައިސަލް ދެއްކެވި ވާހަކަފުޅުގައި، މިކާމިޔާބީތަކަކީ ފަތުރުވެރިކަމުގެ ދާއިރާގައި ހަރަކާތްތެރިވާ ހުރިހާ ފަރާތްތަކެއް ގުޅިގެން ކުރި މަސައްކަތުގެ ނަތީޖާކަން ފާހަގަކުރެއްވިއެވެ. އަދި އެ އެވޯޑުތަކާއި އެކުވެސް އުފެއްދުންތެރިކަމާއި، ތިމާވެށީގެ ރޮނގުން ދެމެހެއްޓެނިވި ގޮތެއްގައި އަދި ފަތުރުވެރިކަމުގެ ދާއިރާގައި ބައިނަލްއަޤްވާމީ ލީޑަރެއްގެ ހައިސިއްޔަތުން ދިވެހިރާއްޖެ ދެމިއޮންނާނެކަމުގެ ޔަޤީންކަން ފައިސަލް ދެއްވި އެވެ.

ފައިސަލް ވަނީ ދެމެހެއްޓެނިވި ގޮތެއްގައި ރާއްޖޭގެ ފަތުރުވެރިކަން ކުރިއެރުވުމަށް ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ގެންގުޅުއްވާ ތަސައްވަރަށްވެސް ޝުކުރު އަދާކުރައްވާފައި އެވެ.

ވޯލްޑު ޓުރެވެލް އެވޯޑްސްގައި ރާއްޖެ އިން ވަނީ އިތުރު އެވޯޑުތަކެއް ވެސް ހާސިލުކޮށްފަ އެވެ. އެގޮތުން ވޯލްޑު ގްރީން ޑެސްޓިނޭޝަން އެވޯޑު ރާއްޖެ އަށް ވަނީ ލިބިފަ އެވެ. މިއީ މި އެވޯޑު ރާއްޖެ އަށް ލިބުނު ފުރަތަމަ ފަހަރެވެ. ޓްރެވެލް އެވޯޑްސް އަކީ 1993 އިން ފެށިގެން ދުނިޔޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ އަގު ވަޒަންކުރުމުގައި ފާހަގަކޮށްލެވޭ މުހިންމު އެވޯޑެކެވެ.